Pirraður yfir því hvað friður er langt undan seilingar

Meðal annars hefur hann sagt að hefði hann verið forseti en ekki Biden hefðu átökin aldrei hafist í fyrsta lagi. Þegar kemur að Úkraínu lofaði hann því jafnvel að binda enda á stríðið á fyrsta degi forsetatíðar sinnar.

Það hefur þó ekki gengið eftir og er Trump sagður ósáttur við hve erfitt þetta hefur reynst.

Í frétt Wall Street Journal segir frá því að forsetinn á fundi í Flórída með fólki sem hefur gefið mikið fé í kosningasjóði hans í síðustu viku, hafi Trump lýst því yfir hvernig hann væri orðinn meira pirraður yfir stöðunni og gæti jafnvel átt erfitt með svefn vegna erfiðleikanna.

Trump var spurður út í hans erfiðustu utanríkismál og sagði hann þá sérstaklega erfitt að eiga við Vladimír Pútín, forseta Rússlands, og að forsetinn rússneski vildi „fá allan pakkann“, eða alla Úkraínu. Hann nefndi einnig að erfitt væri að binda enda á stríðið á Gasa vegna þess að „þeir hafa verið að berjast í þúsund ár“.

Kvartar yfir Pútín

Lítið lát virðist á báðum átökum og segist Trump hafa verið að grínast með að binda enda á stríðið í Úkraínu.

Bandaríkjamenn fóru þar að auki í átök við Húta í Jemen en þeim er nú lokið aftur. Einnig virðist sem viðræður við klerkastjórnina í Íran um mögulega þróun kjarnorkuvopna séu strand og þar að auki á Trump í viðskiptadeilum við fjölmörg ríki heims.

Bandaríkjamenn virðast þó hafa spilað stóra rullu í að koma á vopnahléi milli Indverja og Pakistana.

WSJ hefur eftir heimildarmönnum sínum að Trump hafi kvartað við ráðgjafa sína yfir því að Pútín vilji ekki binda enda á innrás sína og að hvorki hann né Úkraínumenn séu tilbúnir til málamiðlunar.

Hann hefur einnig spurt ráðgjafa sína hvort þeim finnist Pútín vera breyttur frá fyrra kjörtímabili Trumps og sagst hissa á ákvörðunum Pútíns á vígvellinum, eins og það að gera svo umfangsmiklar árásir á óbreytta borgara.

Fyrr á þessu ári talaði Trump um að erfiðara yrði að eiga við yfirvöld í Kænugarði en Pútín. Hann hefur verið harðlega gagnrýndur fyrir að þrýsta lítið sem ekkert á Rússa og þess í stað ganga hart fram gegn Úkraínumönnum.

Áður en nokkrar viðræður hófust byrjuðu Bandaríkjamenn á því að sýna á spilin og slógu nokkur veigamikil viðræðuatriði af borðinu, án þess að Rússar þyrftu að gefa nokkuð eftir.

Sjá einnig: Vilja ræða frið en ekki uppgjöf

Tónninn virðist þó hafa breyst að einhverju leyti. Ráðherrar Trumps og embættismenn hafa gagnrýnt Rússa fyrir lítinn viðræðuvilja og vilja ekki gefa neitt eftir.

Sjá einnig: Segir Pútin ekki vilja enda stríðið

Samhliða því að kalla eftir viðræðum hafa ráðamenn í Bandaríkjunum, eins og Trump, JD Vance varaforseti, og Marco Rubio utanríkisráðherra, gefið til kynna að Bandaríkjamenn muni hætta að reyna að stilla til friðar og jafnvel hætta einnig að aðstoða Úkraínumenn, sem yrði mikill fengur fyrir Rússa.

Fimm leiðtogar í Kænugarði

Fjórir evrópskir þjóðarleiðtogar sóttu Vólódímír Selenskí, forseta Úkraínu, heim í dag. Það voru þeir Keir Starmer, forsætisráðherra Bretlands, Emmanuel Macron, forseti Frakklands, Friedrich Merz, nýr kanslari Þýskalands, og Donald Tusk, forseti Póllands.

Þar fundurðu þeir með Selenskí og kölluðu þeir meðal annars eftir því að Rússar samþykktu almennt þrjátíu daga vopnahlé, sem Trump hefur lagt til og Úkraínumenn hafa samþykkt. Það hafa Rússar þó ekki viljað gera hingað til.

Selenskí segir að þess sé nú krafist af Rússum að þrjátíu daga vopnahléið hefjist á mánudaginn, án skilyrða, og segir hann Trump styðja þá kröfu.

AP fréttaveitan segir að minnsta kosti 117 óbreytta úkraínska borgara hafa fallið í dróna- og eldflaugaárásum Rússa frá því Úkraínumenn sögðust samþykkja vopnahléstillöguna, þann 11. mars. Rúmlega þúsund hafa særst.

Macron ræddi við blaðamenn í Kænugarði í morgun og þá sagði hann sameiginlega heimsókn þjóðarleiðtoganna vera sögulega. Hún markaði þáttaskil þegar kæmi að evrópskri öryggisstefnu og sjálfstæði Evrópu.

„Þetta eru nýir tímar. Þetta er Evrópa sem lítur á sig sem stórveldi.“

Mörg ríki Evrópu stefna nú á umfangsmikla hernaðaruppbyggingu sem má að hluta til rekja til ótta við að Evrópa geti ekki lengur reitt sig á Bandaríkin.

Meðal markmiða þessara uppbyggingar er að gerbreyta öryggiskerfi Evrópu og reiða mun minna á Bandaríkin en áður hefur verið gert.

Sjá einnig: Kvarta sáran yfir vopnakaupum Evrópu

Á fundi þeirra fjögurra og Selenskís hringdu þeir í Donald Trump og ræddu einnig við hann. Meðal annars eru þeir sagðir hafa talað um leiðir til að þrýsta á Rússa til að samþykkja vopnahléið.