Sjálfsafgreiðslukassarnir skili ekki lægra vöru­verði

„Ætli þetta sé ekki svona ein algengasta spurningin sem maður fær hjá fólki úti í bæ þegar maður er á einhverju spjalli. Um daginn fékk ég nákvæmlega þessa spurningu og ég ákvað að spyrja til baka hverjar væru væntingarnar hjá einstaklingnum og bara svona til að reyna að fatta hvað myndi fólk vilja fá mikla lækkun,“ segir Björgvin Víkingsson, framkvæmdastjóri Bónuss, í Reykjavík síðdegis.

Til umræðu var tilkoma sjálfsafgreiðslukassa og hvort slík tækni skili sér til neytenda með lægra vöruverði. Björgvin segir að umræddur einstaklingur hefði vilja um þriggja prósenta lækkun á vöruverði vegna tilkomu sjálfsafgreiðslukassanna.

„Það sem er svolítið skemmtilegt í því er að ef við förum í þriggja prósenta lækkun í Bónus væri félagið farið nánast á hausinn á ansi stuttum tíma af því að það er svo lítið sem við skiljum eftir. En ég held að fólk fatti ekki hvað álagningin er í rauninni lág og hvað er verið að berjast fyrir miklu hjá okkur.“ 

Kemur í veg fyrir fjölgun starfsmanna

Launakostnaður fyrirtækisins lækki ekki þrátt fyrir að ekki þurfi að manna afgreiðslukassana á sama hátt. Þess í stað fari starfsmennirnir á sjálfsafgreiðslukassasvæðið sem þurfi stöðugt að vakta.

„Við þetta er vissulega verið að fjárfesta líka í tækninýjungum, viðhaldi og allri þeirri þróun sem fylgir,” segir Björgvin.

Þjófnaður hefur einnig aukist með tilkomu sjálfsafgreiðslukerfisins.

„Það hefur tekist vel að halda því niðri, þannig að í rauninni það sem við erum að gera með sjálfsafgreiðsluna er bara að bæta þjónustu fyrir viðskiptavini og í rauninni koma í veg fyrir það að þurfa að bæta við fleiri starfsmönnum þegar kemur að aukinni sölu, því við erum að sjá aukna veltu í gegnum verslanir okkar.“

Forsvarsmenn Bónuss horfi á tæknina sem bætingu á þjónustu sem stytti raðir í stað einhvers sem lækki vöruverðið.

„Við erum vissulega að reyna að koma upp fleiri sjálfsafgreiðslukössum þar sem við getum til þess að anna eftirspurninni frekar en eitthvað annað.“