Aukin skatt­heimta og aukin sam­keppni í boði ríkisins

Fyrir tæpri viku hóf landsbyggðarstrætó, sem rekinn er af Vegagerðinni, að aka með farþega alla leið að flugstöðinni á Keflavíkurflugvelli og sækja farþega á nýrri stöð. Nýja stöðin er á fjarstæði fyrir hópferðabíla.

Rútufyrirtæki sem nota stæðið til að sækja farþega þurfa að greiða fyrir það þrettán þúsund og fimm hundruð krónur hvert skipti. Strætó mætir tólf sinnum á sólarhring sem þýðir að á einni viku er kostnaðurinn rúm milljón króna.

Björn Ragnarsson, forstjóri Icelandia, gagnrýnir þetta.

„Þarna er Vegagerðin að eyða peningum skattgreiðenda í að greiða Isavia fyrir að færa sig nær flugstöðinni og markmiðið virðist vera að ná í ferðamenn. Það finnst okkur sérstakt, að ríkið sé að keppa við okkur einkaaðilana,“ segir Björn. 

Á sama tíma sé verið að skera niður þjónustu landsbyggðarstrætós annars staðar á landinu. Hann segist hafa áhyggjur af stöðunni.

„Ég held að ríkið sé að niðurgreiða þessa leið fyrir á annað hundrað milljónir. Manni finnst sérstakt að ríkið sé að fara í það að niðurgreiða þetta enn frekar á sama tíma og verið er að boða aukna skattheimtu á ferðaþjónustuna,“ segir Björn.