Sig­ríður Hrefna hættir hjá Nóa Siríus

Sigríður Hrefna tilkynnti starfsmönnum um brotthvarf sitt á fundi í dag. Aðspurð hvað taki við hjá henni slær hún á forvitni blaðamanns í bili.

„Þú færð allar fréttir um það á morgun,“ svarar Sigríður Hrefna hlæjandi.

Hún bætir við að hún sé full tilhlökkunar varðandi það sem fram undan er og skilur við Nóa Siríus full þakklætis.

„Ég tók við þessu félagi í miklum vandræðum. Félagið var varla gjaldfært en er núna skuldlaust. Þannig að ég get ekki verið annað en sátt og glöð.“

Sigríður Hrefna tók við stöðu forstjóra fyrir tæpum þremur árum eftir að hafa starfað hjá Íslandsbanka þar sem hún var framkvæmdastjóri einstaklingssviðs. Hún er með embættispróf í lögfræði frá lagadeild Háskóla Íslands og MBA-gráðu frá Copenhagen Buisness School. Áður en hún starfaði hjá Íslandsbanka var Sigríður Hrefna framkvæmdastjóri smásölusviðs Olís.