Sýn sakar Rúv um að mata ráðu­neytið á röngum tölum

Þetta kemur fram í umsögn Sýnar sem barst í Samráðsgátt stjórnvalda 12. október.

Frumvarpsdrögunum um breytingar á lögum um Ríkisútvarpið er ætlað að draga úr umsvifum RÚV á auglýsingamarkaði. Lagt er til að ríkisframlag verði skert um fjárhæð sem svarar til tíu prósenta af verðleiðréttu meðaltali auglýsingatekna undanfarinna fjögurra ára. Auglýsingatekjur umfram 2,8 milljarða króna komi einnig til frádráttar ríkisframlagi.

Sýn gagnrýnir undirbúning þessara breytinga og telur eftirlit Fjölmiðlanefndar með starfsemi RÚV hafa brugðist.

Segja ráðuneytið ekki hafa haft skýrsluna

Sýn óskaði eftir að ráðuneytið afhenti lokaða útgáfu skýrslu Sambands evrópskra sjónvarpsstöðva, EBU, á grundvelli upplýsingalaga. Félagið gekk út frá því að samanburður í greinargerð frumvarpsdraganna byggði á henni.

Samkvæmt umsögninni svaraði ráðuneytið 8. október að það hefði ekki skýrsluna undir höndum. Hún væri lokuð og aðeins aðgengileg RÚV vegna aðildar þess að EBU. Ráðuneytið hefði jafnframt upplýst að RÚV hefði neitað að afhenda skýrsluna og því gæti það ekki veitt aðgang að henni.

Sýn telur þetta vekja alvarlegar spurningar um vinnubrögð og hlutlægni við undirbúning frumvarpsins.

„Allt bendir til þess að starfsmenn RÚV hafi matað ráðuneytið á sérvöldum og beinlínis röngum tölfræðigögnum, enda kemur berum orðum fram í frumvarpsdrögunum að haft hafi verið samráð við RÚV við samningu frumvarpsins.“

Telja tölunum ruglað saman

Í greinargerð frumvarpsdraganna segir að tæplega áttatíu prósent almannaþjónustumiðla í Evrópu, sem eigi aðild að EBU, séu fjármögnuð með sambærilegum hætti og RÚV, með opinberum framlögum og viðskiptatekjum.

Sýn telur þetta ranga túlkun á tölunum. Félagið segir opinbera útgáfu EBU-skýrslunnar sýna að um 78 prósent samanlagðra tekna miðlanna komi úr opinberum sjóðum. Það sé annað en að áttatíu prósent miðlanna séu fjármögnuð með sambærilegum hætti og RÚV.

Telja RÚV stýra upplýsingagjöfinni

Sýn lýsir vinnubrögðunum sem stofnanatöku. Með því á félagið við að RÚV stýri upplýsingunum sem berast stjórnvaldinu sem á að setja starfsemi þess skorður.

Félagið telur RÚV þannig hafa komið í veg fyrir eðlilega og rétta upplýsingagjöf til þeirra sem semja frumvarpið, keppinauta og almennings. 

Sýn segir undanþágur sem RÚV hafi fengið frá takmörkunum á starfseminni jafnframt bera merki um að þetta hafi viðgengist lengi.

Sýn beinir sambærilegri gagnrýni að Fjölmiðlanefnd. Félagið segir nefndina ekki hafa tekið upp eitt einasta mál að eigin frumkvæði á árunum 2022 til 2025 um fyrirferð RÚV á auglýsingamarkaði. Þá telur Sýn að nefndin hafi gefist upp á sjálfstæðu eftirliti með því hvernig RÚV sinni almannaþjónustuhlutverki sínu.

Vísir er í eigu Sýnar hf.