„Það að þeir hafi viljað losa okkur út kemur svo sem ekkert á óvart“

Að sögn Ívars Þórðarsonar, annars eiganda Humarhússins, hefur veitingahúsið glímt við mikla rekstrarerfiðleika og ekki náð að borga leigu í rúmt ár vegna áhrifa faraldursins. 

Þrátt fyrir það hafi ákvörðun FÍ fasteignafélags komið á óvart þar sem fyrir lá að nýir fjárfestar hefðu áhuga á að koma með aukið fé inn í reksturinn. Þá hafi leigusalinn nýlega boðist til að lækka leiguna ef viðskiptin gengu í gegn. Morgunblaðið greindi fyrst frá lokuninni.

Ívar segir að FÍ fasteignafélag hafi fram að því ekki viljað veita afslátt af leigunni í ljósi rekstraraðstæðna. Þó hafi leigusalinn á vissan hátt komið til móts við Humarhúsið með því að leyfa staðnum að vera áfram í húsnæðinu eftir að leigugreiðslur stöðvuðust.

Skoða nú framhaldið

Óvissa ríkir nú um framtíð þessa rótgróna veitingastaðar en til skoðunar er hvort reksturinn verði fluttur í nýtt húsnæði með aðkomu fjárfestanna.

Ívar segist sýna því skilning að þeim hafi verið gert að yfirgefa húsnæðið eftir að eigendur Humarhússins tóku einhliða ákvörðun um að stöðva leigugreiðslur. Sú staða myndi þó breytast með tilkomu nýrra fjárfesta.

„Þeir hættu að senda okkur reikninga vitandi að við gætum ekki borgað. Við vorum ekki að fela okkar stöðu og við náðum að þrauka miklu lengur en við gerðum ráð fyrir.“

Ívar segir umrædd fjárfesting hafi nánast verið í höfn þegar bréfið afdrifaríka barst frá leigusalanum síðasta fimmtudag.

„Það að þeir hafi viljað losa okkur út kemur svo sem ekkert á óvart en þetta er svolítið undarleg tímasetning þar sem leigusalinn vissi að fjárfestar voru að koma inn og fleiri á leiðinni. Hann var ekki búinn að heyra í okkur eða fjárfestunum í einhverjar þrjár vikur þegar hann sendir bréfið,“ segir Ívar.

Ýmis tækifæri þarna úti

Ívar tók yfir rekstur Humarhússins um áramótin 2016 ásamt meðeigandanum Johnny Turtiainen. Hafa þeir þurft að mæta ýmsum áskorunum á síðustu árum líkt og fleiri aðilar í veitingarekstri og ferðaþjónustu.

„Við greiðum fyrir þessi kaup á þremur árum og í sama mánuði og við greiðum síðustu greiðsluna þá fer WOW air á hausinn og það setur strik í reikninginn. Þar kom smá hökt og svo kemur Covid-19. Fram að því höfðum við alltaf staðið við allt okkar gagnvart leigusalanum.“

Ívar segist enn vera að jafna sig eftir raunir síðustu daga en hann sé þó ágætlega bjartsýnn á framhaldið.

„Við erum bara enn að lenda og átta okkur á þessu. Hvað framtíðin ber í skauti sér kemur bara í ljós. Það eru ekkert nema tækifæri þarna úti,“ segir Ívar Þórðarson, annar eigandi Humarhússins.