Al­gengast að færri en fjórir skoði eign í fyrstu viku á sölu

Þetta er meðal þess sem fram kemur í mánaðarskýrslu Húsnæðis- og mannvirkjastofnunar um stöðuna á fasteignamarkaði. Þar segir að framboðið hafi aukist hlutfallslega mest í nágrenni höfuðborgarsvæðisins þar sem séu nú um 67 prósent fleiri íbúðir til sölu en í apríl 2025.

Sá tími sem tæki að selja núverandi framboð miðað við söluhraða síðasta mánaðar, mælist nú um níu mánuðir í nágrenni höfuðborgarsvæðisins samanborið við um sex mánuði á höfuðborgarsvæðinu og annars staðar á landsbyggðinni.

Sekta leigusala

Í skýrslunni segir að á hafi almenn skráningarskylda leigusamninga nú verið í gildi frá áramótum og ætli HMS að nýta heimild til að sekta leigusala sem sinni ekki skráningarskyldu, finnist skýr dæmi um vanrækslu.

Skráningarskyldunni er ætlað að bæta yfirsýn yfir leigumarkaðinn en leiguskrá geymir mikilvægar upplýsingar um gilda leigusamninga. Upplýsingar úr leiguskrá leiða til að mynda í ljós að aðfluttir leigjendur greiða að jafnaði hærra leiguverð en innfæddir leigjendur fyrir smærri leiguíbúðir þegar leigt er af einstaklingum á höfuðborgarsvæðinu.

Ný íbúða­lán á breyti­leg­um vöxt­um á hverf­andi hveli

Um lánamarkaðinn segir að hann hafi tekið nokkrum breytingum frá því að vaxtadómarnir hafi fallið síðasta haust vegna breytts lánaframboðs.

„Hlutdeild verðtryggðra lána á breytilegum vöxtum af nýjum íbúðalánum til heimila hefur skroppið verulega saman eftir vaxtadóminn en hlutdeild óverðtryggðra lána hefur aukist á móti. Í febrúar síðastliðnum tóku heimilin ný óverðtryggð lán fyrir hærri upphæð heldur en verðtryggð lán, umfram uppgreiðslur, í fyrsta skipti í þrjú ár.

Þétt­ing mæt­ir mestri and­stöðu með­al eldra fólks í út­hverf­um

Á byggingarmarkaði var íbúðauppbygging umfram nýja íbúðaþörf í fyrra vegna lítillar fólksfjölgunar. Enn er talsverður fjöldi íbúða í virkri uppbyggingu samkvæmt marstalningu HMS, en mikill meirihluti íbúða í byggingu á höfuðborgarsvæðinu í dag eru í stórum fjölbýlum með 17 eða fleiri íbúðum í stigagangi. Ný könnun HMS bendir hins vegar til þess að búsetuóskir um fjölbýli beinist ekki síður að fjölbýlishúsum með færri íbúðum. Könnunin sýndi jafnframt að viðhorf til skipulagsmála eru misjöfn eftir aldri og búsetu. Þétting byggðar mætir mestri andstöðu meðal þeirra sem eldri eru og þeirra sem búsettir eru í úthverfum Reykjavíkur og öðrum sveitarfélögum á höfuðborgarsvæðinu,“ segir í skýrslunni.