Í­búar vilja fella úr gildi starfs­leyfi Hyg­ge vegna mengunar

Íbúar segja að afturkalla eigi starfsleyfið því að skilyrði varðandi sorp og meðhöndlun úrgangs, meðal annars, hafi ekki verið uppfyllt við útgáfu leyfisins. Samkvæmt starfsleyfi er Hygge er heimilað að framleiða sætmeti og/eða brauðmeti á staðnum og/eða selja eða dreifa á aðra staði. Kæran er hér. 

Leyfið nær einnig til hitunar og eldunar á tilbúnu hráefni á staðnum, s.s. heitum samlokum og smáréttum, framleiðslu á súpum og forpökkuðum sultum, salötum, mauki og skálum til dreifingar á aðra staði. Starfsleyfið nær einnig til veisluþjónustu fyrir kaffihlaðborð. Í starfsleyfinu kemur fram að ekki megi vera starfsemi í rýminu eftir klukkan 23.30 á kvöldin.

Fjallað var um það í sumar að eigendur bakarísins biðu í 245 daga eftir rekstrarleyfi. Í viðtali við Bítið á Bylgjunni í sumar sagði einn eigenda, Axel Gunnarsson, að sorphirðumál hefðu verið ein ástæða þess að útgáfa leyfisins tafðist svo.

„Þetta tafðist aftur. Þannig að í stuttu máli þá var þannig að þeir vildu ekki að upprunalega sorpið sem var þarna frá fyrrum veitingastað væri þarna sem það átti að vera. Þannig við þurftum að finna aðra lausn og við þurftum að koma því fyrir og þeir að koma og gefa grænt ljós. Þá mátti það allt í einu ekki vera þar og þeir hættu við. Þá þurftum við aftur að fara grafa eitthvað og þá allt í einu mátti upprunalega sorpið vera til staðar,“ sagði Axel í sumar.

Ruslagerðið ekki nóg fyrir tvo veitingastaði

Í stjórnvaldskærunni sem fjallað var um á fundi heilbrigðisnefndar borgarinnar fyrr í þessari viku. Þar er farið yfir forsögu máls og segir að þegar veitingastaðurinn Grazie Trattoria tók til starfa 2021 að Hverfsgötu 96 hafi verið útbúið sérstakt rými fyrir ruslið í porti bak við húsin en að aldrei hafi verið gert ráð fyrir því að annað slíkt rými yrði reist.

Þá segir einnig að það sé ljóst að stærð ruslagerðisins dugi ekki fyrir Grazie því umgengni um það sé slæm og ítrekað hafi verið kvartað yfir því. Þá kemur fram að ákveðið hafi verið á húsfundi að nýting ruslagerðisins yrði ekki önnur nema með samþykki húsfundar og furða íbúar því sig á því að Grazie hafi heimilað öðrum leigutökum hússins að nota það.

Bent er á að í umsögn heilbrigðiseftirlits komi fram að ruslagerðið sé ekki nægilega stórt fyrir bæði Grazie og Hygge og því sé ekki hægt að sameina sorpaðstöðu beggja fyrirtækja í því ruslagerði sem er til staðar. Það sé því engin sorpaðstaða fyrir Hygge og segja íbúar að það hefði átt að leiða til þess að umsókn Hygge hefði aldrei verið samþykkt. Íbúar krefjast þess vegna að úrskurðarnefnd umhverfis- og auðlindamála ógildi ákvörðun heilbrigðiseftirlits s um að gefa út starfsleyfi.

Loftræsismál í ólestri líka

Í kærunni er einnig fjallað um loftræstimál og að þau séu í ólestri, frá rekstri bæði Grazie og Hygge berist veruleg mengun og að heilbrigðiseftirlit hafi staðfest lyktarmengun í sameign húsanna og frá útblæstri á svölum íbúðar 501, auk þess sem útblástur frá rýmunum hefur mengað verulega. Þá er einnig vísað til þess að rörin séu ekki í samræmi við lög og frágangurinn hafi leitt til mengunar og skerðingu loftgæða fyrir íbúa hússins.

Í kæru segir enn fremur að útgáfa leyfisins og reksturinn sé afar íþyngjandi fyrir íbúa. Hún feli í sér aðra og mun umfangsmeiri hagnýtingu á séreignarrými en hafði áður verið áætlað.