Um­fram­eftir­spurn eftir skulda­bréfum Play

Umframeftirspurn var eftir skuldabréfunum en upphafleg áskriftarloforð voru tuttugu milljónir Bandaríkjadollara, eða rétt rúmir 2,4 milljarðar króna. Fjárhæðin við lok útgáfu skuldabréfanna nam hins vegar 23 milljónum Bandaríkjadollara, eða rúmum 2,8 milljörðum króna. Öllum fyrirvörum útboðsins hefur verið aflétt og fjármögnun félagsins lokið.

„Þessi niðurstaða staðfestir þá tiltrú sem fjárfestar bera til Play og framtíðaráforma félagsins. Fjármögnunin styrkir rekstrargrundvöll félagsins verulega og gerir Play kleift að einbeita sér að arðbærum verkefnum og áframhaldandi vexti,“ stendur í fréttatilkynningu Play.

Í vetur hyggst Play starfrækja fjórar vélar frá Íslandi, með áhafnir frá Íslandi á íslenskum kjarasamningum samkvæmt tilkynningunni. Flogið verður til sólarlanda í Suður-Evrópu auk nokkurra áfangastaða í Norður-Evrópu, þar á meðal Kaupmannahafnar og Liverpool. Hinar sex vélarnar verða nýttar í arðbær leiguverkefni, sem ætti að tryggja félaginu stöðugar tekjur allt árið um kring.

Líkt og áður hefur komið fram verður flogið undir maltnesku flugrekstrarleyfi og íslenska leyfinu skilað. Að auki verður flugi til Norður-Ameríku hætt nú í lok október og áfangastöðum í Norður-Evrópu fækkað.

„Við erum afar ánægð með hversu sterk viðbrögð fjárfesta hafa verið. Þetta er skýr staðfesting á því að markaðurinn hefur trú á Play, framtíðarsýn okkar og þeirri stefnu sem við höfum markað. Með þessum áfanga stöndum við betur undirbúin en nokkru sinni fyrr til að dafna sem öflugt alþjóðlegt flugfélag með sterkar íslenskar rætur. Við stefnum að miklum viðsnúningi í rekstri og hlökkum til að kynna nýja og spennandi áfangastaði fyrir Íslendingum á næstunni,“ er haft eftir Einari Erni Ólafssyni, forstjóra Play, í tilkynningunni.