Þrír gagna­vísinda­menn til Snjall­gagna

Fyrirtækið er tíu manna hugbúnaðarhús í Reykjavík sem sérhæfir sig í þróun gervigreindarlausna fyrir atvinnulífið.

Í tilkynningu segir að Alexander O'Donovan-Jones sé að upplagi rafeindaverkfræðingur frá University of Reading í Englandi. 

„Hann starfar hjá Snjallgögnum sem hugbúnaðar- og gagnafræðingur. Helsta hlutverk hans hjá Snjallgögnum er að byggja upp þjónustu, samþættingu og ferla sem hjálpa fyrirtækinu og teyminu að byggja lausnir á sviði gervigreindar, sem hafa burði til að skara fram úr. Alexander kemur til Snjallgagna frá Kara Connect. Hann hefur 18 ára reynslu af nýsköpunarverkefnum hjá sprotafyrirtækjum. Þar hefur hann til að mynda leitt þróun á skalanlegum skýjalausnum og stjórn tækniinnviða í greinum á borð við alþjóðlega leikjahönnun, peningaþvætti, ferðaþjónustu á netinu og heilbrigðistækni.

Ásmundur Alma Guðjónsson er hugbúnaðarverkfræðingur með 10 ára starfsreynslu sem sérhæfir sig í náttúrulegri málvinnslu (NLP) með áherslu á að efla máltækni og gervigreindardrifnar lausnir og stuðla að nýsköpun í hugbúnaðarþróun. Ásmundur kemur til Snjallgagna frá 1984 ehf. Hann er með BSc-gráðu í hugbúnaðarverkfræði og MSc-gráðu í máltækni frá Háskólanum í Reykjavík. Ásmundur hefur víðtæka reynslu af gervigreind og vélanámi og starfað við verkefni á borð við þróun gervigreindarlíkana og forritun á bak- og framendum hugbúnaðarkerfa.

Gunni Singh er gagnavísindamaður með fjölbreytta reynslu úr fjarskipta-, ráðgjafar- og upplýsingatæknigeiranum. Gunni hefur meistaragráðu í gervigreind frá Queen’s University í Kanada, þar sem hann hlaut styrk fyrir framúrskarandi árangur, og B.Com-gráðu í markaðsfræði frá University of Guelph. Gunni kemur til Snjallgagna frá Activity Stream. Hann hefur unnið að þróun og innleiðingu gagnadrifinna lausna og lagt áherslu á greiningu viðskiptavina, spálíkön og sjálfvirkni rekstrarferla. Gunni hefur sérhæft sig í að nýta gervigreind og gagnavinnslu til að bæta viðskiptaárangur og rekstrarhagkvæmni. Hann hefur leitt ýmis verkefni sem samþætta tækni og stefnumótun til að hámarka skilvirkni og skapa virði fyrir fyrirtæki,“ segir í tilkynningunni.