Thelma Kristín ráðin verk­efnis­stjóri Jafn­vægis­vogar FKA

Thelma Kristín Kvaran hefur verið ráðin verkefnastjóri Jafnvægisvogar FKA.

Í tilkynningu frá Félagi kvenna í atvinnulífinu segir að Thelma Kristín sé starfandi stjórnendaráðgjafi hjá ráðgjafarfyrirtækinu Intellecta og hafi umtalsverða reynslu á sviði stjórnunar. Thelma er með B.Sc. í viðskiptafræði frá Háskólanum á Bifröst og M.Sc. í mannauðsstjórnun frá Háskóla Íslands.

„Thelma Kristín mun vinna náið með stjórnendum í fyrirtækjum, sveitafélögum og stofnunum og þjónusta atvinnulífið í gegnum störf sín fyrir Jafnvægisvogina. Stjórnendur í íslensku samfélagi eru að takast á við áskoranir þar sem Jafnvægisvogin er þarft verkfæri og góð leið til að dýpka skilningi á jafnréttismálum og auðvelda atvinnulífinu að verða við þeim kröfum sem hið opinbera regluverk setur okkur í málaflokknum.

Jafnvægisvogin er hreyfiaflsverkefni sem unnið er í samstarfi við forsætisráðuneytið, Sjóvá, Deloitte, Árvakur og PiparTBWA. Tilgangur verkefnisins er að auka jafnvægi kynja í efsta lagi stjórnunar fyrirtækja í íslensku viðskiptalífi og virkja íslenskt viðskiptalíf til að verða að fyrirmynd jafnréttis fyrir aðrar þjóðir,“ segir í tilkynningunni.