Fyrst íslenskra löggiltra endurskoðenda til að verða með­eig­andi stórs endur­skoðunar­fyrir­tækis er­lendis

Bryndís Símonardóttir varð um síðustu mánaðamót fyrst íslenskra löggiltra endurskoðenda til að gerast meðeigandi (partner) hjá einum af fjórum stóru endurskoðunarfyrirtækjunum annars staðar en á Íslandi.

Í tilkynningu frá Félagi íslenskra endurskoðenda segir að hin 36 ára Bryndís hafi orðið meðeigandi hjá Deloitte í Danmörku, en hún er löggiltur endurskoðandi bæði í Danmörku og hér heima. Meðeigendur hjá Deloitte í Danmörku eru nú 242.

„Ferlið sem Bryndís gekk í gegnum hófst á kynningu á árinu 2018 fyrir helstu stjórnendum endurskoðunarsviðs Deloitte. Hún var svo valin í meðeigendaferli sem er kallað HPP (High Potential Program), þar sem 20-25 starfsmenn sem stefna að því að verða meðeigendur eru valdir árlega.

Í þessu ferli er fyrst og fremst lögð áhersla á mannlega þáttinn til að styrkja einstaklinginn í stjórnendahlutverkinu, bæði andlega og líkamlega. Þeir sem komast í gegnum þetta ferli leggja fram umsókn um stöðu partners og viðskiptaáætlun sem rökstyður á hvaða forsendum sú ætti að verða niðurstaðan. Eftir yfirferð stýrihóps, kynnti Bryndís viðskiptaáætlun sína fyrir stjórnendum Deloitte. Eftir þá kynningu var niðurstaðan sú að Bryndísi var boðið að verða meðeigandi í fyrirtækinu,“ segir í tilkynningu frá FLE.

Stóru endurskoðunarfyrirtæki heims eru Deloitte, PricewaterhouseCoopers (PwC), Ernst & Young (EY) and KPMG.