Saman hjá Teymi, Basko og nú Skeljungi

Ólafur Þór Jóhannesson hefur verið ráðinn nýr framkvæmdastjóri fjármálasviðs Skeljungs, en stjórn félagsins ákvað í morgun að breyta skipuriti Skeljungs. Í tilkynningu félagsins til Kauphallarinnar er þess getið að ráðist hafi verið í breytingarnar að frumkvæði forstjórans, Árna Péturs Jónssonar, sem starfaði áður með fyrrnefndum Ólafi hjá Basko og Teymi.

Greint var frá því í upphafi vikunnar að forveri Ólafs Þórs, Benedikt Ólafsson, hafi sagt upp störfum eftir fjögur ár sem framkvæmdastjóri fjármálasviðs.

Helstu breytingarnar eru þær að sölusviði Skeljungs hefur verið skipt upp í tvö svið, fyrirtækjasvið og einstaklingssvið. Þórður Guðjónsson mun áfram leiða fyrirtækjasviðið en forstjórinn Árni Pétur mun leiða einstaklingssvið Skeljungs. Már Erlingsson mun taka við stöðu aðstoðarforstjóra Skeljungs auk þess sem hann mun stýra rekstrarsviði félagsins. Undir það svið mun heyra mannauðs- og skrifstofumál, upplýsingatækni og bókhald

Gró Björg Baldvinsdóttir, yfirlögfræðingur Skeljungs, mun aukinheldur taka sæti í framkvæmdastjórn félagsins.

Samhliða þessum tilfærslum hefur verið tekin ákvörðun um að leggja niður skrifstofu- og samskiptasvið. Við það færast markaðsmál til einstaklingssviðs, sem líkt og áður sagði er stýrt af forstjóra félagsins.

Í tilkynningu Skeljungs til Kauphallarinnar er ferill hins nýja framkvæmdastjóra fjármálasviðs jafnframt rakinn:

Ólafur hefur verið sjálfstætt starfandi ráðgjafi síðan 2018 og auk þess að sinna stjórnarstörfum í nokkrum félögum. Áður gegndi hann stöðu framkvæmdastjóra fjármálasviðs og staðgengils forstjóra Basko ehf. eða frá 2012-2018. Þá var Ólafur framkvæmdastjóri Miðengis ehf., eignarhaldsfélags í eigu Íslandsbanka, frá 2010-2012. Á árunum 2006-2010 gegndi hann stöðu framkvæmdastjóra fjármálasviðs Teymis hf. sem var skráð félag í Kauphöll Íslands. Á árunum 1996-2006 starfaði Ólafur á endurskoðunarsviði PricewaterhouseCoopers og varð síðar eigandi. Auk þess sinnti hann kennslu í Háskólanum í Reykjavík við viðskiptadeild háskólans og starfaði fyrir prófnefnd löggiltra endurskoðenda. Ólafur er með Cand.oecon próf í viðskiptafræðum frá Háskóla Íslands og er löggiltur endurskoðandi.