Skrúfa fyrir eina helstu leiðina fyrir gas til Úkraínu

Aðgerðir ungverskra stjórnvalda tengjast því að Druzhba-olíuleiðslan frá Rússlandi sem liggur í gegnum Úkraínu hefur verið lokuð í nærri því tvo mánuði og sér ekki fyrir opnun hennar ennþá. 

Úkraínsk stjórnvöld segja leiðsluna hafa skemmst í drónaárásum Rússa og að þau geti ekki hætt lífum tæknimanna sinna í að reyna sífellt að gera við hana. 

Bæði Orbán og Robert Fico, starfsbróðir hans í Slóvakíu, hafa sakað Úkraínumenn um að stöðva olíuflutning Rússa viljandi. Þeir fóstbræður eru helstu bandamenn Vladímírs Pútín Rússlandsforseta í Evrópu og fengu undanþágu frá ESB til að halda áfram að flytja inn rússneska olíu þrátt fyrir innrásarstríð Rússa í Úkraínu.

Ungverska ríkisstjórnin tilkynnti í dag að gasleiðsla sem sá Úkraínumönnum fyrir um 45 prósentum af öllu því jarðgasi sem þeir fluttu inn í fyrra verði lokuð þar til Druzgba-olíuleiðslan kemst aftur í gagnið. Ungverjar segjast ætla að nota gasið til þess að fylla á eigin forða, að því er kemur fram í frétt AP-fréttastofunnar.

Aukin óvild í garð Úkraínu í harðri kosningabaráttu

Orbán berst nú fyrir pólitísku lífi sínu í kosningum sem fara fram í næsta mánuði. Útlit er fyrir að hann gæti tapað fyrir miðhægriflokki Peters Magyar. Forsætisráðherrann hefur brugðist við andbyrnum með því að herða enn á andstöðu sinni við Úkraínu. Lýsti hann Úkraínu meðal annars sem óvini Ungverjalands.

Ungverski forsætisráðherrann kom í veg fyrir að Evrópusambandið samþykkti níutíu milljarða evra lán til Úkraínu vegna óánægju hans með lokuðu olíuleiðsluna í síðustu viku. Hann hótar því að beita neitunarvaldi gegn öllum frekari lánveitingum þar til hún verður opnuð aftur.

Þá hefur hann stöðvað olíuflutninga til Úkraínu og beitt neitunarvaldi á frekari refsiaðgerðir Evrópusambandsins gegn Rússlandi.