Dregur í land og segir Starmer og fé­laga verð­launa Hamas

Aukinnar óánægju gætir innan flokks stuðningsmanna Trump forseta með afstöðu Bandaríkjanna til stríðsreksturs Ísraela. Það sást skýrast í ummælum sem hann lét falla þegar hann var spurður út í ákvörðun Frakka að viðurkenna Palestínuríki.

„Ég ætla ekki að taka afstöðu. Það truflar mig ekki ef [Keir Starmer forsætisráðherra Bretlands] tekur afstöðu,“ sagði hann við breska blaðamenn.

Andmælti Netanjahú

Hann hafði áður brugðist talsvert neikvæðar við yfirlýsingu franskra stjórnvalda um viðurkenningu á Palestínuríki en það vakti þó athygli að hann hefði ekki tekið afdráttarlausar til orða en að segja að yfirlýsing Macrons Frakklandsforseta „skipti engu máli.“

Þegar hann var svo spurður út í það, af bresku blaðamönnunum, hvort hann væri sammála bersýnilega ósönnum fullyrðingum Benjamíns Netanjahú forsætisráðherra Ísraels um að á Gasaströndinni væri engin hungursneyð svaraði hann því neitandi.

„Miðað við sjónvarpið, myndi ég segja: ekkert sérstaklega. Því að þessi börn koma mér ansi svöng fyrir sjónir. Það er raunveruleg hungursneyð, það er ekki hægt að falsa það,“ sagði Trump.

Takmarkaður stuðningur innan herbúða MAGA

Við komuna aftur til Bandaríkjanna hefur tónninn hvesst örlítið í garð yfirlýsinga vestrænna ráðamanna en í gær bættust Kanadamenn í hóp ríkja sem hyggjast viðurkenna Palestínuríki á fundi allsherjarþings Sameinuðu þjóðanna í september næstkomandi.

Þegar yfirlýsingar Frakka og Breta voru aftur bornar undir hann kvaðst hann ekki vera „þeim megin.“

„Við ræddum það aldrei. Maður verðlaunar Hamas með því. Mér finnst ekki að það eigi að verðlauna þá,“ sagði hann þá.

Blikur eru á lofti í herbúðum MAGA-sinna um að stuðningur þeirra við Ísraela sé á hverfanda hveli. Steve Bannon, fyrrum ráðgjafi forsetans og áhrifamikill hugsuður innan MAGA-hreyfingarinnar, hafði orð á því við blaðamenn Politico að stuðningur yngri Trumpista við Ísraelsmenn væri þorrinn.

Fyrir skemmstu kom annar áhrifamikill Trumpisti, fulltrúadeildarþingkonan Marjorie Taylor Greene, öllum á óvart þegar hún vísaði til stríðsreksturs Ísraela í Palestínu sem þjóðarmorðs. Hún þykir einhver ofstækisfyllsti repúblikaninn á Bandaríkjaþingi og vöktu því ummæli hennar mikla athygli vestanhafs.