„Grindavíkuráhrifin“ leiða til tals­verðrar hækkunar hjá ná­grönnum

Fasteignamat er notað til útreikninga á fasteignagjöldum sem sveitarfélög ákvarða, á erfðafjárskatti og á stimpilgjaldi á þinglýsingu kaupsamninga. Einnig nota sumar lánastofnanir hlutfall af fasteignamati til að ákvarða lánsupphæð.

Hægt er að fletta upp fasteignamati einstakra fasteigna á heimasíðu HMS ef þig, lesandi, langar til að gaumgæfa fasteignamat þinnar eignar.

Mestar eru fasteignamatshækkanir milli ára á Suðurnesjum og Norðurlandi. Hin svokölluðu Grindavíkuráhrif vega þungt í fasteignamatshækkunum á Reykjanesinu. Mesta markaðsvirknin reyndist vera á suðvesturhorni landsins.

„Nágrannasveitarfélög Grindavíkur hafa hækkað töluvert, það er að segja fasteignamatið hjá þeim; hækkaði um 12% hjá Vogum, Ölfusi og Reykjanesbæ og í Suðurnesjabæ hækkaði fasteignamatið um 17%. Á höfuðborgarsvæðinu voru hækkanir aðeins minni, ef frá er talið Seltjarnarnes þar sem var tiltölulega mikil virkni,“ sagði Jónas Atli Gunnarsson, hagfræðingur hjá HMS.

Engin hækkunartala er fyrir Grindavík því ákvörðun var tekin um að fasteignamatið myndi haldast óbreytt milli ára því fasteignamarkaðurinn í Grindavík er óvirkur sem stendur.“

Áhugaverð þróun á sér einnig stað norður í landi. Fasteignamat íbúða í nágrannasveitarfélögum Akureyrar hækkar umtalsvert milli ára.

„Upp úr 2017 byrjuðu nágrannasveitarfélög nágrannasveitarfélagsins að hækka í verði og í raun myndaðist stórhöfuðborgarsvæði þar sem fólk í nágrannasveitarfélögum var að sækja sér þjónustu í höfuðborginni en þótti í lagi að búa aðeins fyrir utan og þessi mikla hækkun í nágrannasveitarfélögum Akureyrar bendir til þess að það er eitthvað svipað að gerast þar.“