Reyna að ráða niður­lögum sinuelds við Apa­vatn

Lárus Kristinn Guðmundsson, varaslökkviliðsstjóri hjá Brunavörnum Árnessýslu, segir í samtali við fréttastofu að útkall um eldinn hafi borist rétt fyrir klukkan fjögur. Slökkviliðsmenn frá Laugavatni, Selfossi og Reykholti vinna að því að slökkva eldinn.

„Þetta gengur ágætlega, en þetta tekur svolítinn tíma. Svæðið er erfitt yfirferðar og það þarf að leggja út mikið af slöngum. Það fer talsverð vinna í það.“

Ekki liggur fyrir að svo stöddu hversu stórt svæði er undir eldinum.

Lárus minnir fólk á hversu mikilvægt það sé að fara varlega með eld.