Skapa ís­lenska sundstemningu í New York

Styrmir Elí Ingólfsson Vigdísarson, Alexander Breki Jónsson og Bjarki Sigurðarson eru mennirnir á bak við verkefnið en þeir hafa búið í New York undanfarin þrjú ár.

Styrmir segir að hugmyndin hafi sprottið fram vegna þess að þeir félagarnir söknuðu þess að komast í sund, sánu og heita potta í New York. Þeir hafi verið að leita að slíkri þjónustu en ekkert fundið sem samsvaraði því sem þeir þekktu á Íslandi.

„Við fundum ekkert nema dýrari líkamsræktarstöðvar og spa klúbba sem eru töluvert dýrari og gera gestunum kannski ekki kleift að stunda það reglulega. Markmiðið er að búa til þjónustu sem fólk getur notfært sér reglulega,“ segir Styrmir.

Hugmyndin sé tveggja til þriggja ára gömul, en vinna hafi byrjað fyrir einu ári og unnið hafi verið af miklum krafti undanfarna sex mánuði.

Komnir með fjármögnun upp á milljón dollara

Styrmir segir að þremenningarnir séu komnir með stórt teymi í kringum sig. Þeir séu í miðju ferli að klára leigusamning fyrir rýmið og stefnt sé að því að klára það í sumar og að framkvæmdir geti hafist í haust.

Þá hafi þeir verið að klára fyrstu umferð fjármögnunar þar sem þeir söfnuðu einni milljón bandaríkjadollara.

Sindri Snær Jensson, sem er einn eiganda Húrra Reykjavíkur og Flatey Pizza, er meðal fjárfesta í verkefninu en aðrir vilja halda nafnleynd.

Framkvæmdir muni taka hátt í ár, þannig stefnt sé að því að opna sundlaugina árið 2026.

Styrmir segir að fasteignamarkaðurinn í Manhattan sé ekki eins erfiður og maður myndi halda.

„Það er ákveðið tímabil í fasteignamarkaðnum hérna úti. Eftir Covid var mikið skrifstofurými sem losnaði, og markaðurinn hefur ekkert jafnað sig eftir það. Það eru hérna ónotuð skrifstofurými sem samsvara 24 Empire state byggingum bara á Manhattan,“ segir hann.

Þremenningarnir hafi skoðað hátt í 30 staði fyrir sundstaðinn. Hann vill þó ekki alveg tilkynna um það hver staðsetningin verður fyrr en gengið hefur verið frá leigusamningnum.

„Ég vil ekki jinxa þetta en ef maður er klókur getur maður fundið alls konar fasteignir hérna sem eru á viðráðanlegu verði,“ segir hann.

Hann segir þó að verið sé að skoða svokallað þakrými, þannig fólk geti stigið út og andað að sér fersku lofti.

Bjartsýnn á að verðið verði viðráðanlegt

Styrmir segir að þeir muni gera allt sem í þeirra valdi stendur til að tryggja viðráðanlega verðskrá. Markmiðið sé að setja rýmið þannig upp að fólk vilji stunda þetta reglulega.

„Við eigum eftir að tilkynna um það nákvæmlega hvernig þetta mun líta út. En við munum skapa straumlínulagað kerfi þar sem við verðum til dæmis með sjálfsafgreiðslu. Svo erum við ekki að bjóða upp á neina aukaþjónustu eins og nudd eða svoleiðis. Þetta er ekki spa.“

„Við erum einfaldlega að skapa rými þar sem fólk kemst í heitan pott, sánu og getur stigið út il að anda að sér fersku lofti,“ segir Styrmir.

Engin sundlaug til að synda í verður á svæðinu, en þar verða heitir pottar, sánur, gufuböð, köld kör og garðsvæði.

Setja alla sína orku í sundið

Styrmir Elí er menntaður leikari, en hann flutti til New York til að læra leiklist. Hann útskrifaðist úr Stella Adler leiklistarskólanum 2023, en hefur bakgrunn úr fyrirtækjarekstri, ferðamannaiðnaði og laxveiðiheiminum þar sem hann hefur starfað undanfarin ár.

Alexander Breki er verkfræðingur sem hefur starfað við ráðgjöf í New York undanfarin ár hjá Simon-Kucher. Bjarki er menntaður í stjórnun og stefnumálum og hefur einnig starfað við ráðgjöf, síðast hjá Brú-Strategy.

Báðir eru útskrifaðir frá Columbimbia háskólanum í New York.

Allir þrír hafa sagt skilið við fyrri störf og vinna nú hörðum höndum að sundlaugarverkefninu.

„Við héldum viðburð í Scandinavian house fyrir tveimur vikum á Manhattan og þangað mættu 200 manns þar sem við vorum að setja vefsíðuna okkar í loftið og auglýsa vörumerkið.“

„Þetta gekk mjög vel, við erum að byggja upp smá stemningu fyrir þessu í borginni og það er spenningur að myndast fyrir þessu verkefni,“ segir Styrmir Elí.