Vill láta hart mæta hörðu

Sigurður Ingi Jóhannsson hafði áður boðað slíka ályktun sem svar Íslands við verndaraðgerðum Evrópusambandsins vegna járnblendisframleiðslu í sambandsríkjum. Aðgerðirnar bitna á Íslendingum og Norðmönnum.

„Við getum augljóslega notað þau rök sem Evrópusambandið notar, að tollfrjáls innflutningur á matvælum frá Evrópusambandinu hafi umtalsverð áhrif á innlenda matvælaframleiðslu,“ sagði Sigurður Ingi á Alþingi í liðinni viku.

Í tillögunni sem útbýtt var á þinginu í dag segir að Alþingi álykti að fela fjármála- og efnahagsráðherra að undirbúa og leggja fram frumvarp til breytinga á tollalögum þess efnis að lagður verði viðbótartollur, að lágmarki 10%, á þær matvörur frá Evrópusambandinu sem framleiddar eru innan lands í verulegu magni og keppa við innflutning. Jafnframt verði ráðherra falið að meta og, eftir atvikum, beita öryggisákvæðum EES-samningsins til að bregðast við viðvarandi efnahagslegum og þjóðfélagslegum erfiðleikum í íslenskri matvælaframleiðslu sem feli í sér tímabundna takmörkun eða stöðvun tollkvóta og annarra innflutningsheimilda fyrir kjöt- og mjólkurvörur sem keppi við innlenda framleiðslu.

„Enn fremur verði ráðherra falið að undirbúa og leggja fram frumvarp til tímabundinnar lækkunar virðisaukaskatts af matvælum úr 11% niður í 8% í tvö ár til að draga úr áhrifum verðbólgu og styðja við heimili í landinu.

Ráðherra skilgreini nánar þá vöruflokka sem sæti viðbótartollum eða öryggisráðstöfunum og þá matvöruflokka sem falli undir lægra virðisaukaskattsþrep samkvæmt lögum um virðisaukaskatt,“ segir í tillögunni.

Ólíklegt má telja að ályktunin nái fram að ganga enda hefur Daði Már Kristófersson fjármálaráðherra þegar hafnað hugmyndinni. Engin vestræn þjóð ætti eins mikið undir og Íslendingar hvað frjáls viðskipti varðaði.

„Ég er þeirrar skoðunar að við eigum að standa vörð um þetta kerfi. Það er hins vegar ljóst að þetta þarf að hafa afleiðingar. Við getum ekki setið hjá og horft á þessar breytingar eiga sér stað. Við eigum mikið undir og við þurfum að standa með áframhaldandi frelsi og reglum í samskiptum þjóða,“ sagði Daði.