Raf­myntir hrynja í verði eftir tolla­hótanir

Trump tilkynnti um tollana sem koma til með að leggjast ofan á 30 prósenta toll sem þegar er lagður á vörur frá Kína. Tilkynningin kemur í kjölfar ákvörðunar Kínverja að innleiða tálma á sölu sjaldgæfra málma.

Ráðamenn í Kína greindu frá því í gærmorgun að nýir og umfangsmeiri tálmar yrðu innleiddir á sölu svokallaðra sjaldgæfra málma og allra vara unninna úr þeim. Slíkir tálmar voru einnig settir á útflutning á liþíumrafhlöðum. Sjaldgæfir málmar og vörur unnar úr þeim eru ómissandi fyrir framleiðslu tækni á borð við heilbrigðistæki, rafbíla og smára sem eru undirstaða raftækni nútímans.

Markaðir í Bandaríkjunum hafa brugðist illa við yfirvofandi viðskiptastríði, en auk S&P vísitölunnar sem lækkaði um 2,7 prósent, lækkaði Nasdaq vísitalan um 3,56 prósent, og Dow Jones vísitalan um 1,9 prósent.

Rafmyntir hafa einnig lækkað í verði, en Bitcoin hefur lækkað um ríflega 10 prósent, Ethereum um 11,2 prósent, og BNB. Solana, og XRP hafa lækkað um 14,29 prósent, 14,9 prósent, og 17,99 prósent.