Misstu þrjá dróna í gosið við tökur á sýningunni

„Með nýrri kvikmyndatækni fá gestir að svífa yfir gjósandi eldfjöll og kafa niður í miðju jarðar til að sjá kraftinn sem þar býr og hefur sett svip sinn á landið okkar,“ segir Hreiðar Þór Jónsson framkvæmdastjóri sýningarinnar.

Hann segir sýninguna ólíka öllu öðru sem er í boði á Íslandi. Sýningin sé sýnd með háþróaðri margvíddarbíótækni sem eigi sér engan samanburð á heimsvísu.

„Við leggjum í sýningunni áherslu á Reykjavík, höfuðborgarsvæðið, og förum svo á Reykjanes og upp í Bláfjöll. Við erum með myndir þar sem fólk er nánast horfir ofan í gíginn. Við misstum þrjá dróna í gosið í tökunum. Við fórum nær en við hefðum átt að fara,“ segir Hreiðar.

Í kjallara Hörpu

Sýningin er rekin í rými í kjallara Hörpu, K2, en vegna mikillar lofthæðar sem þarf fyrir sýninguna nær salurinn upp í K1. Tugir hátalara eru í rýminu og stærsti LED-skjár landsins. Sýningin opnar formlega næsta laugardag.

Sýningin hentar bæði fullorðnum og börnum en Hreiðar segir hana líklega ekki henta börnum yngri en fjögurra ára vegna þess að á meðan sýningunni stendur er verið að segja sögu sem yngri börn kannski skilji ekki. Jóhannes Haukur leikari les söguna sem er lesin á meðan sýningunni stendur. Sýningin er níu mínútur og verður sýnd á korters fresti í kjallaranum í Hörpu.

„Þetta snýst um að söguna og krakkarnir þurfa að njóta sín líka og skilja hvað er í gangi. Það er engum greiði gerður með að vera með yngri börn inni,“ segir Hreiðar.

Hann segir sem dæmi ekki möguleika á að fara út í miðri sýningu. Auðvitað sé hægt að stöðva hana en vegna hristings og annars þurfi að stöðva sýninguna ætli fólk að fara eða eitthvað gerist. Starfsmenn fylgist vel með.

Á íslensku og ensku

„Við erum búin að prófa sýninguna á alls konar fólki. Það komu ung börn í gær og eldri borgarar og það komu allir lifandi út. En við tilkynnum auðvitað alltaf að það sé hristingur og ef þú ert með bakverki eða einhverja króníska verki þá hentar þessi sýning líklega ekki.“

Fyrir fullorðna kostar 2.990 krónur á sýninguna og 2.690 fyrir börn.

Titill sýningarinnar er á ensku og segir Hreiðar það hafa verið skoðað að hafa titilinn á íslensku en ekkert fundist sem hentaði.

„Þetta er tillaga sem kom frá Brandenburg og sú sem varð fyrir valinu. Við ætluðum að reyna að íslenska en það tókst eiginlega ekki nema fólk héldi að þetta væri lestarferð.“

Hægt er þó að sjá sýninguna á bæði íslensku og ensku og er tekið mið af hverjum hóp fyrir sig. Hreiðar gerir þó ráð fyrir því að á virkum dögum verði sýningin oftar á ensku og um helgar oftar á íslensku.