Rannsaka hvort Farvel hafi gerst sekt um saknæmt athæfi

Lögreglan rannsakar nú meint saknæmt athæfi ferðaskrifstofunnar Farvel en eins og greint hefur verið frá séu tugir viðskiptavina fyrirtækisins eftir með sárt ennið þegar það varð gjaldþrota. 

Frá þessu er greint í Fréttablaðinu í dag en Ferðamálastofa svipti ferðaskrifstofuna starfsleyfi í desember síðastliðnum en hafði í marga mánuði þar á undan farið þess á leit við Farvel að tryggingar fyrirtækisins yrðu hækkaðar og bættar. 

Þegar Farvel fór síðan á hausinn stóðu tryggingarnar aðeins undir broti af þeim fargjöldum sem viðskiptavinir höfðu þegar greitt fyrir en þær ferðir voru aldrei farnar. 

Þá segir í blaðinu að viðskiptavinir séu óánægðir með viðbrögð Ferðamálastofu í málinu sem er sökuð um linkind gagnvart Farvel.