Ráðin fram­kvæmda­stjóri Mundo

Una Helga Jónsdóttir hefur tekið við stöðu framkvæmdarstjóra hjá Ferðaskrifstofunni Mundo.

Una Helga tekur við stöðunni af Margréti Jónsdóttur Njarðvík, eiganda Mundo og nýsettum rektor Háskólans á Bifröst.

Í tilkynningu kemur fram að Una Helga sé fornleifafræðingur að mennt og hafi starfað hjá Mundo í um þrjú ár. Áður hafi hún einnig starfað fyrir spænsku ræðisskrifstofuna á Íslandi og í túrista- og fiskigeiranum.

„Hún hefur auk þess óbilandi áhuga á þeim verkefnum sem ferðaskrifstofan stofnar til, en Mundo hefur á síðustu árum sérhæft sig í, og orðið leiðandi ferðaskrifstofa á sviði menningar- og hreyfiferða ásamt námsferða fyrir skólastarfsmenn auk þess sem unglingastarf er þar í hávegum haft, en Mundo býður upp á skiptinám fyrir unglinga ásamt sumarbúðum bæði innanlands og erlendis, svo fátt eitt sé nefnt,“ segir í tilkynningunni.