Slagurinn kostaði 2,2 milljarða

Actavis Group hefur selt allt hlutafé sitt í króatíska lyfjafyrirtækinu PLIVA til Barr Pharmaceuticals. Útboðsferlinu þar sem Barr og Actavis slógust um tíma um PLIVA lauk formlega í gær og hefur Barr eignast 92 prósent hlutafjár í PLIVA. Barr/PLIVA er þar með orðið þriðja stærsta samheitalyfjafyrirtæki heims.

Eignarhlutur Actavis og kaupréttarsamningar nam 20,8 prósentum af heildarhlutafé PLIVA og var seldur á 820 kúnur á hlut, í samræmi við yfirtökutilboð Barr. Söluandvirði bréfanna nemur því rétt um 37 milljörðum króna, en hagnaður Actavis af sölunni mætir að hluta kostnaði sem félagið hefur borið af yfirtökuferlinu.

Gjaldfærður kostnaður Actavis af yfirtökuferlin nemur 25 milljónum evra,eða tæpum 2,2 milljörðum íslenskra króna og verður hann reikningsfærður á þriðja ársfjórðungi þessa árs. Hefur þá verið tekið að fullu tillit til hagnaðs af sölu bréfanna. Gjaldfærslan er ekki sögð hafa áhrif á fjárhagsleg markmið félagsins á árinu.

Yfirtökuferlið er sagt það flóknasta sem Actavis hefur ráðist í og fól meðal annars í sér ítarlega áreiðanleikakönnun, kostnað vegna bankatryggingar og umsóknarferli til samkeppnisyfirvalda í 14 löndum.

Róbert Wessman, forstjóri Actavis, segir ákvörðunina um að selja hlutinn í PLIVA vera í samræmi við fjárfestingastefnu Actavis. „Við töldum ekki rétttlætanlegt að greiða hærra verð fyrir félagið en við höfðum áður boðið og teljum það ekki lengur þjóna hagsmunum félagsins að halda hlut okkar í félaginu,“ segir hann og kveður áfram leitað að fjárfestingatækifæra með það markmið að skipa Actavis í hóp stærstu samheitalyfjafyrirtækja.