Piparúða beitt við hand­töku í Hafnar­firði

Þetta er meðal þess sem fram kemur í dagbók lögreglunnar frá því klukkan sjö í morgun en á tímabilinu barst tilkynning um að handalögmál hafi brotist út í garði í miðbæ Hafnarfjarðar lögreglunni á stöð 2.

Þegar laganna verðir voru mættir á vettvang hafi annar maðurinn hlaupið á brott, virt fyrirmæli lögreglu að vettugi og veitt mikla mótspyrnu við handtöku sem hafi leitt til þess að beita þurfti piparúða. Hann var fluttur á lögreglustöð og gisti þar í fangageymslu.

Kom eitt og annað í ljós 

Á sama varðsvæði voru höfð afskipti af manni á mótorhjóli sem undu upp á sig ef svo má að orði komast. Fyrst kom í ljós að hann væri undir áhrifum fíkniefna eða áfengis og akandi án þess að vera með ökuréttindi.

Þá reyndist bifhjólið vera ótryggt og kom á daginn að maðurinn væri með þýfi í fórum sínum en hann gerði því næst „heiðarlega tilraun til þess að stinga af“. Hann var handtekinn og fluttur á lögreglustöð.

Fjöldi ökumanna um allan bæ var stöðvaður í akstri og þar á meðal voru þrír stöðvaðir vegna hraðaksturs. Á varðsvæði lögreglustöðvar 3, sem nær yfir Kópavog og Breiðholt, varð umferðaróhapp þar sem ökumaður mótorhjóls féll af hjólinu og slasaðist. Hann var fluttur með sjúkrabíl á slysadeild til athugunar og aðhlynningar.