32 látnir eftir að krani féll á lest í Taí­landi

Breska ríkisútvarpið segir frá því að kraninn hafi fallið á lestina sem varð til þess að hún fór út af sporinu og varð einn lestarvagninn alelda á meðan aðrir krömdust.

Talsmaður yfirvalda segir að 171 farþegi hafi verið um borð þegar slysið varð um klukkan níu að morgni að staðartíma.

Rannsókn er hafin á slysinu og hefur ríkislestarfélag Taílands tilkynnt að til standi að stefna byggingafélaginu sem ábyrgð bar á krananum.

Talsmaður byggingafélagsins segist harma málið og að til standi að greiða slösuðum og aðstandendum hinna látnu miskabætur.

Lestin var á leið frá höfuðborginni Bangkok til Ubon Ratchathani-héraðs þegar slysið varð.