Sex tíma leikskóladvöl nú gjaldfrjáls í Hafnar­firði

Átta tíma vistun fyrir eitt barn kostar alls 44.308 krónur, sjö og hálf klukkustund 36.438 krónur og sjö klukkustundir 28.568 krónur. Með því að hafa barnið í vistun í sex klukkustundir greiðir fólk aðeins annað hvort síðdegis- eða morgunhressingu og hádegismat sem er samtals 10.473.

„Með sex tíma gjaldfrjálsum leikskóla erum við að létta undir með fjölskyldum og styrkja jafnvægið milli fjölskyldulífs og atvinnu,“ segir Valdimar Víðisson bæjarstjóri Hafnarfjarðar, í tilkynningu.

Þessi breyting hefur samkvæmt tilkynningu ekki áhrif á fjölskyldur sem þurfa lengri dagvistun fyrir börnin sín. Gjöld fyrir fulla vistun hækka aðeins um það sem nemur almennri hækkun á gjaldskrá sveitarfélagsins um áramót.

Þar kemur fram að leikskóladagurinn er óbreyttur þrátt fyrir þessa gjaldskrárbreytingu. Markvisst fagstarf og stoðþjónusta fer fram á milli klukkan 9 til 15 og svo eru frjálsar leikstundir frá klukkan 7:30 til 9 og eftir klukkan 15.

Mislangir dagar en alls 30 klukkustundir

Dagarnir mega vera mislangir, þannig barnið til dæmis byrji seinna einn daginn en í tilkynningu. Ef dvöl hefst klukkan átta að morgni lýkur sex tíma gjaldfrjálsri dvöl klukkan 14, en klukkan 15 ef dvöl hefst klukkan níu. Dagar mega vera mislangir svo lengi sem heildardvalartími er ekki meiri en 30 klukkustundir. Þá er sett skilyrði um fjögurra stunda lágmarksdvöl á dag alla virka daga.  

Valdimar segir í tilkynningu að með breytingunni sé gerð tilraun til að tryggja gæði leikskólastarfsins haldist óskert og að jafnræði ríki óháð aðstæðum foreldra.

„Við viljum bjóða upp á meiri sveigjanleika og jafnt aðgengi að vandaðri leikskólaþjónustu án þess að fórna gæðum.“

Á reiknivél leikskólagjalda á hafnarfjordur.is er hægt að reikna út leikskólagjöld. Reiknivélin reiknar út meðaltal dvalartíma barns á viku.    

Álíka breytingar annars staðar

Svipaðar breytingar hafa verið innleiddar í Kópavogi, Akureyri og víðar, þó með meiri gjaldskrárhækkunum. Slíkar breytingar hafa einnig verið boðaðar í Reykjavík en hafa ekki tekið gildi. Samráðshópur tilkynnir á nýju ári hverjar breytingar verða eftir opið samráð.