„Búið að búa okkur systkinin undir það ef allt færi á versta veg“

Sjálf segist Birgitta að eðlisfari vera mjög jákvæð en einnig hafi hún lagt sig fram við að tileinkna sér jákvætt hugarfar og viðhorf. Þar sé níræður afi hennar henni mikil hvatning og fyrirmynd í lífinu en hún lýsir sambandi þeirra á skemmtilegan og einlægan hátt í byrjun viðtalsins.

Hann spjallar við alla og er svo jákvæður. Ég hef fengið allskonar sögur hvað fólk er þakklátt fyrir að afi hafi komið til þeirra og bjargað þeim á erfiðum tímum.

Feimnin og viðtölin

Birgitta segist aldrei hafa séð það fyrir sér að verða opinber persóna sem væri undir smásjá almennings. Manneskja sem væri milli tannana á fólki og færi í viðtöl um líf sitt, enda hafi hún alltaf verið frekar feimin. 

„Var mjög feimin þegar ég var yngri en ég hef með tímanum reynt að sigrast á því,“ segir Birgitta sem þakkar afa sínum fyrir hvatningu og að hafa trú á sér.

Þegar rætt er meira um þessa smásjá almennings, sem getur oft á tíðum verið heldur til óvægin, segist Birgitta hafa fengið góð ráð hjá föður sínum sem hún reyni að minna sig á reglulega. 

Ekki lesa kommentin, ekki pæla í þessu. Þú veist fyrir hvað þú stendur! Kassann út!

Leiðinlegar og særandi athugasemdir geti þó alltaf læðst undir skelina og þá sé hún meðvituð um það að hún sjálf og þeir sem standi henni næst viti hvað hún stendur fyrir og hvaða gildum hún standi fyrir. 

Vill vera góð fyrirmynd

Birgitta segir það gleðja mikið þegar hún fái skilaboð frá mæðrum ungra stelpna sem þakki henni fyrir að vera góð fyrirmynd fyrir dætur sínar. Það skipti hana miklu máli og hún leggi sig fram við það að veita öðrum innblástur og hafa góð áhrif. 

Ræktin og heilbrigða djammið

Ásamt því að starfa sem markaðsstjóri World Class og vera nokkurs konar andlit fyrirtækisins er Birgitta einnig eigandi Bankastrætis Club. 

Birgitta segist aldrei hafa reykt en drekki áfengi í hófi og finnist gaman að lyfta sér upp með vinum. 

Ég hef aldrei gert neitt sem er sterkara en áfengi en ég hef heyrt allskonar um mig. En ég veit fyrir hvað ég stend og allir í kringum mig segja: Birgitta? Hún er síðasta manneskjan til að gera eitthvað!

Hún segir það kómískt þegar einhverjir furði sig á því hvernig sé hægt að vera bæði í forsvari fyrir líkamsræktarstöð, sem ímynd heilsusamlegs lífsstíls og á sama tíma að reka skemmtistað. Hún segir það þó vera fráleitt að setja samasem-merki á milli óheilbrigðs lífsstíls og þess að reka og eiga skemmtistað. 

„Mig langar að vera fyrirmynd og sína að maður getur gert bæði. Á heilbrigðan hátt.“

Foreldrar Birgittu, Bjössi og Dísa, áttu á tímabili tvo skemmtistaði, Ingólfskaffi og Þjóðleikhúskjallarann sem þau ráku samhliða World Class. 

Birgitta segir í raun það oft á tíðum sama fólkið sem stundi ræktina og klúbbana, fólk sem vilji fara út og vera á meðal fólks og rækta sig eða skemmta sér. Hún segir mikilvægt að fólk líti ekki alltaf á djammið sem eitthvað sem er óheilbrigt og það þurfi alltaf að tilheyra ofurölvun og vökur fram undir morgun. 

 Í hennar tilviki sé það fjarri lagi og hún njóti þess frekar að fara snemma út, hitta fólk og koma frekar fyrr heim og fara svo í ræktina daginn eftir. 

Mér persónulega finnst þetta tvennt fara vel saman og finnst svolítið fordómar þegar fólk er að segja annað.

Segir foreldra sína alltaf hafa unnið mikið

Aðspurð um æskuárin tengd World Class ævintýrinu segist Birgitta hálf partinn alin upp í líkamsræktarstöðinni sem hefur frá upphafi verið sameiginleg ástríða fjölskyldunnar. 

World Class stöðvarnar eru í dag átján talsins og segir Birgitta velgengni og stærð World Class veldisins í dag oft vera uppsprettu neikvæðra radda. 

Fólk sér hvernig þetta er í dag og heldur að þetta hafi alltaf verið svona.

Birgitta lýsir foreldrum sínum sem miklum dugnaðarforkum sem aldrei hafi gefist upp og þau hafi unnið hörðum höndum að sinni velgengi allt frá byrjun. 

Hún minnist þess þegar hún var lítil og kom heim úr skólanum að þá hafi aldrei verið neinn heima. Foreldrar hennar hafi yfirleitt verið í vinnu til sex eða sjö öll kvöld. 

Undirbúin undir það að missa allt

Birgitta talar einnig einlægt um upplifun sína þegar stóra stökkið í stækkun fyrirtækisins var tekið þegar Laugar opnuðu, en þá var Birgitta ellefu ára gömul. 

„Þetta var mjög mikið stökk og mikil áhætta,“ segir Birgitta sem lýsir því hvernig foreldrar hennar ræddu heiðarlega um stöðu mála við þau systkinin. 

Það var búið að búa okkur systkinin undir það ef allt færi á versta veg, segir Birgitta sem minnist þess að þarna hafi foreldrar hennar unnið dag og nótt til að láta hlutina ganga upp. Þetta hafi verið rétt fyrir jólin og ákveðið hafi verið að gefa engar jólagjafir þetta árið. 

Það var búið að skuldsetja allt. Það var búið að veðsetja húsið og húsin hjá ömmu og afa báðum megin og selja alla bílana. Mamma og pabbi voru bara á hjólum!

Hún segir þó allt hafa gengið vonum framar og allt hafi sem betur fer verið upp á við í rekstrinum frá þessu. 

Birgitta segist sjálf full meðvituðum um þau forréttindi sem hún búi yfir í lífinu og sé þakklát fyrir það líf sem hún lifi í dag. Afbrýðisemisraddir verði þó eðlilega alltaf til staðar og ekkert við því að gera nema að vera meðvitaður um sín gildi, njóta lífsins og reyna að láta gott af sér leiða. 

Ástin og hamingjan

Nýlega fann Birgitta ástina í örmum Enok Jónssonar og sé hún í dag mjög ástfangin, hamingjusöm og glöð. Enok er níu árum yngri en Birgitta og segir hún í fyrstu hafa velt því aðeins fyrir sér en þegar leið á alveg hætt að pæla í aldursmuninum, enda ekkert tilefni til.  

Hún sagði það hafa komið sér mjög mikið á óvart hvernig fjölmiðlar hafi slegið aldursmuninum upp sem fyrirsögn þegar þau opinberuðu sambandið og hversu miklar skoðanir fólk hafi haft á því. 

Er fólk bara í alvöru að pæla í þessu?

Í viðtalinu sem má hlusta í heild sinni hér fyrir neðan ræðir Birgitta einnig um BA námið í lögfræði, dansinn sem hefur verið hluti af lífi hennar alla tíð, alla drauma og framtíðina.