Einar Bárðarson ráðinn samskiptastjóri Hafnarfjarðarbæjar

Einar Bárðarson hefur verið ráðinn samskiptastjóri Hafnarfjarðarbæjar en um tímabundna ráðningu er að ræða frá 1. ágúst næstkomandi og til 31. ágúst 2018. Þetta kemur fram í fréttatilkynningu frá Hafnarfjarðarbæ.

Einar starfaði áður sem rekstrarstjóri Reykjavík Excursions og var forstöðumaður Höfuðborgarstofu. Síðustu misseri hefur hann starfað sem sjálfstæður ráðgjafi í ferðaþjónustu.

Í starfi sínu sem samskiptastjóri sveitarfélagsins mun Einar annast samskipti og samstarf við fjölmiðla, hafa yfirumsjón með auglýsingum og kynningarefni, sinna stefnumótun og samhæfingu í upplýsinga- og ferðamálum. Hann tekur tímabundið við af verkefnum Árdísar Ármannsdóttur sem er á leið í fæðingarorlof.

Þá hefur Andri Ómarsson, verkefnastjóri á stjórnsýslusviði, tekið við viðburðatengdum verkefnum.