Opnuðu nýja Saga Lounge á Keflavíkurflugvelli

Icelandair opnaði í gærkvöldi nýja setustofu á Keflavíkurflugvelli, Saga Lounge, í nýrri byggingu á efstu hæð flugstöðvarinnar.

Í tilkynningu segir að um sé að ræða „1400 fermetra svæði þar sem fer saman falleg norræn hönnun, innblásin af íslenskri náttúru og menningu og frábært útsýni yfir flugstarfsemina á vellinum og alla leið til Snæfellsjökuls.

Nýja setustofan er um tvöfalt stærri en sú eldri, sem var í kjallara flugstöðvarinnar. Sætum og veitingastöðum er fjölgað og þægindi aukin. Icelandair Saga Lounge er einn af fjölsóttari samkomustöðum landsins en gert er ráð fyrir að gestir félagsins þar verði um 120 þúsund á árinu.“

Þeir Eggert Ketilsson og Stígur Steinþórsson hönnuðu setustofuna og höfðu að leiðarljósi stefnu Icelandair „um að bjóða viðskiptavinum endurnærandi íslenska upplifun með lita,- og efnisvali og sérstökum munum eins og afsteypu af þekktum álfasteini.“