Sjálf­stæðis­flokkur mælist stærstur

Munurinn á flokkunum er aðeins 0,6 prósentustig og innan vikmarka könnunarinnar. Vikmörkin eru 2,7 prósentustig hjá báðum flokkum.

Fylgi Sjálfstæðisflokksins eykst um 2,3 prósentustig frá könnun Maskínu í júní. Flokkurinn hefur verið á mikilli siglingu undanfarna mánuði og fylgi hans aukist úr 13,5 prósentum í janúar í 25 prósent nú.

Fylgi Samfylkingarinnar minnkar hins vegar um 0,8 prósentustig milli mánaða. Flokkurinn mældist með tæplega 32 prósenta fylgi síðasta haust en er nú kominn niður í 24,4 prósent.

Framsókn tapar en Flokkur fólksins bætir við sig

Miðflokkurinn mælist þriðji stærsti flokkurinn með 13,4 prósent en flokkurinn var með rúmlega 22 prósent í janúar þegar fylgi Sjálfstæðisflokksins var hvað minnst. Viðreisn kemur á hæla Miðflokksins með 12,7 prósenta.

Framsóknarflokkurinn tapar 1,9 prósentustigum milli mánaða og mælist nú með 6,6 prósent. Flokkur fólksins bætir aftur á móti við sig 1,8 prósentustigum og mælist með 5,9 prósent.

Vinstri græn mælast með 4,9 prósent, Sósíalistaflokkurinn með fjögur prósent og Píratar með 3,1 prósent. Þeir þrír flokkar eru því undir fimm prósenta þröskuldinum fyrir úthlutun jöfnunarsæta.

Ríkisstjórnin með 43 prósent

Samanlagt fylgi ríkisstjórnarflokkanna þriggja, Samfylkingarinnar, Viðreisnar og Flokks fólksins, mælist 43 prósent. Það er 1,3 prósentustigum meira en í júní en 7,4 stigum minna en flokkarnir fengu samanlagt í kosningunum 2024.

Könnunin fór fram dagana 26. júní til 8. júlí. Alls tóku 963 svarendur afstöðu til flokka.

Uppfært: Áður sagði að Sjálfstæðisflokkurinn hefði mælst stærstur í fyrsta sinn frá kosningum í könnun hjá Maskínu. Eins og sjá má af grafinu mældist Sjálfstæðisflokkurinn stærstur í einni mælinu í mars 2025.