Ein­beita sér að kaffinu eftir lokun kaffi­húsanna

„Ákvörðunin var auðvitað ekki einföld, að loka hér í Kringlunni eftir 31 ár,“ segir Marta Rut Pálsdóttir, rekstrarstjóri kaffihúsa Kaffitárs, og að ytri aðstæður eins og launahækkanir og hækkanir á rekstrarkostnaði hafi gert reksturinn mjög erfiðan.

„Við bara tókum ákvörðun um að loka kaffihúsinu áður en verr færi,“ segir hún.

Hún segir þrátt fyrir þetta spennandi tíma fram undan. Þau séu enn með kaffibrennslu og ætli að einbeita sér að því. Þau séu líka stór á fyrirtækjamarkaði og ætli að vera með pop-up markað.

Þá segir hún félagið einnig einbeita sér að því að koma með nýjar tegundir á markað og ný blanda, Skuggatár, sem hafi komið í sölu fyrir jólin hafi slegið í gegn og þau ætli að „back to basics“ og einbeita sér frekar að kaffinu.

Marta segir margt eftirminnilegt. Þau séu búin að lifa hátt og lágt. Þau hafi rekið ellefu kaffihús í einu og hafi verið á flugstöðinni. Þau hafi heimsótt kaffibændur um allan heim og hafi byggt upp búgarð í Nicaragua.