Meiri­hlutinn fallinn sam­kvæmt nýrri könnun

Miðflokkurinn og Viðreisn bæta töluvert við sig á meðan Framsókn, Píratar og Sósíalistaflokkurinn taka á sig högg. Vinstrið, nýtt sameinað framboð VG og Vors til vinstri, mælist með 13,5% fylgi í nýjum Þjóðarpúlsi Gallup. Miðflokkurinn mælist með 10,7% en var með 2,4% atkvæða í kosningunum 2022. Viðreisn tvöfaldar fylgi sitt.

Samkvæmt könnuninni kysu tæplega 28% Sjálfstæðisflokkinn ef gengið yrði til kosninga í dag, rúmlega 23% Samfylkinguna, rösklega 13% Vinstrið, næstum 11% Miðflokkinn, slétt 10% Viðreisn, nær 4% Framsóknarflokk og Flokk fólksins, ríflega 3% Pírata, tæplega 3% Sósíalistaflokk Íslands og rösklega 1% Okkar borg.

Jafnframt kemur fram í tilkynningu Gallup að nærri 8% svarenda myndu skila auðu og 18% tóku ekki afstöðu eða vildu ekki gefa hana upp, samanlagt um fjórðungur svarenda.

Miðað við þessa niðurstöðu fengi Sjálfstæðisflokkur sjö borgarfulltrúa, Samfylkingin sex fulltrúa, Vinstrið og Miðflokkur þrjá fulltrúa hvor, Viðreisn tvo fulltrúa og Framsóknarflokkur og Flokkur fólksins sinn hvorn fulltrúann, samkvæmt útreikningum Gallup. Þannig fengju Samfylkingin, Vinstrið, Flokkur fólksins og Píratar sem mynda sitjandi meirihluta samtals tíu borgarfulltrúa og næðu ekki þeim tólf sem þyrfti til að mynda meirihluta.