Annar maður skotinn til bana af ICE

Tim Walz, ríkisstjóri Minnesota, greindi fyrst frá á samfélagsmiðlinum X. Miðillinn Minnessota Star Tribune hefur eftir lögreglu að maðurinn sé látinn. Fréttastofa AP hefur undir höndum sjúkrahúsgögn en í þeim segir að hinn látni hafi verið 51 árs.

Á myndbandsupptöku af vettvangi sjást fulltrúar ICE yfirbuga mann og síðan skjóta hann. Ekki liggur fyrir hver aðdragandi árásarinnar var en lögregla segir frá því að maðurinn hafi verið vopnaður byssu og skothylkjum.

AP segir frá því að fjöldi fólks hafi safnast saman eftir skotárásina og hrópað fúkyrði að lögreglumönnum. Táragasi hafi verið beitt á vettvangi motmælanna.

Uppfært 18:30: Á blaðamannafundi segir Brian O'Hara, lögreglustjóri í Minneapolis, að hinn látni hafi verið bandarískur ríkisborgari. Hann hafi haft leyfi fyrir byssunni sem hann bar á mótmælunum. 

„Ég var að tala við Hvíta húsið eftir aðra hræðilega skotárás af hendi fulltrúa alríkisyfirvalda í morgun. Minnesota hefur fengið nóg. Þetta er hræðilegt,“ skrifar Tim Walz á X.

Sex vikur eru síðan fulltrúar ICE tóku til starfa í Minnesota-fylki með það að markmiði að handtaka alla glæpamenn og ólöglega innflytjendur. Þann 7. janúar var hin 37 ára gamla Renee Good var skotin til bana af fulltrúum ICE.

Í framhaldinu hefur mikill fjöldi fólks mótmælt í Minnesota. Í gær voru tugir handteknir fyrir að hlýða ekki fyrirmælum lögreglu á meðan mótmælunum stóð.

Opinber X-aðgangur Minneapolis-borgar greinir frá því á X að unnið sé að rannsókn á málinu og að íbúar séu beðnir um að halda ró sinni og rýma mótmælasvæðið.

Fréttin hefur verið uppfærð.