Rússar segja Selenskí aumkunarverðan trúð

Viðræður áttu að hefjast í morgun en þeim ku hafa verið frestað. Ekki liggur fyrir af hverju en talskona utanríkisráðuneytis Rússlands segir Tyrki hafa lagt til að viðræðurnar færu fram seinni partinn í dag.

Pútín hafnaði aftur á dögunum ákalli eftir almennu þrjátíu daga vopnahlé á átökunum í Úkraínu og lagði þess í stað fram tillögu að viðræðum í Istanbúl. Úkraínumenn og bakhjarlar þeirra hafa sagt að áður en viðræður hefjist þurfi fyrst að koma á vopnahlé.

Selenskí lýsti því þó yfir að hann væri tilbúinn til að mæta til Istanbúl, þar sem viðræðurnar eiga að fara fram, og ræða persónulega við Pútín en hann sagðist ekki ætla að ræða við neinn annan en rússneska forsetann.

Hann sagði þegar flugvél hans lenti í Anakara í morgun að rússneska sendinefndin væri til lítils annars en skrauts. Ekki væri búið að taka loka ákvörðun um viðræður og meðal annars væri verið að ræða málið við Bandaríkjamenn.

Utanríkisráðuneyti Rússlands sendi í kjölfarið út yfirlýsingu um að Selenskí væri „trúður“ og „glataður“ og hefði ekki rétt á því að tala svona um hæft fólk.

Sergei Lavrov, utanríkisráðherra Rússlands, kallaði Selenskí í kjölfarið „aumkunarverðan mann“ vegna þess að hann krafðist þess að Pútín mætti til Tyrklands.

Eins og frægt er sendi Pútín sérsveitarmenn til Kænugarð í upphafi innrásar Rússa í febrúar 2022, sem höfðu það markmið að handsama Selenskí eða ráða hann af dögum. Úkraínumenn segja banatilræði gegn Selenskí hafa verið tíð síðan þá.

Selenskí mun í dag hitta Recep Tayyip Erdogan, forseta Tyrklands, í Ankara en hann mun, samkvæmt starfsmönnum hans, kalla eftir vopnahléi í Úkraínu og friðarviðræðum.

Viðræður ekki líklegar til árangurs

New York Times segir blaðamenn, ljósmyndara og tökumenn bíða fyrir utan Dolmbabache höllina í Istanbúl, þar sem viðræður ríkjanna fóru fram 2022, eftir að rússneskir ríkismiðlar sögðu að viðræðurnar ættu að fara fram þar.

Hins vegar sé óljóst hvort viðræðurnar muni eiga sér stað og jafnvel hvort úkraínskir erindrekar séu yfir höfuð í borginni.

Meðal þeirra sem Pútín sendi til Tyrklands eru Vladimír Medínskí, aðstoðarmaður hans, og Alexander Fomin, aðstoðarvarnarmálaráðherra. Það eru sömu menn og forsetinn sendi til Tyrklands í mars 2022 til að ræða uppgjöf Úkraínu.

Í sendinefndinni eru einnig aðstoðarutanríkisráðherra og yfirmaður GRU, leyniþjónustu Rússneska hersins.

Sjá einnig: Hvorki Pútín né Trump ætla á fund Selenskí

Þeim viðræðum var hætt þegar rússneskir hermenn hörfuðu frá Kænugarði og norðurhluta Úkraínu og ódæði rússneskra hermanna í bæjum eins og Bucha litu dagsins ljós.

Sjá einnig: Viðræðurnar snerust um uppgjöf, ekki frið

Í grein Wall Street Journal segir að sú ákvörðun Pútíns að senda tiltölulega lágt setta erindreka til viðræða þyki benda til þess að þær séu ekki líklegar til árangurs. Það að Medinsky leiði sendinefndina gefi til kynna að kröfur Pútíns séu engu minni en þær voru 2022.

Þær feli í raun í sér endalok Úkraínu sem fullvelda ríkis og að gera Úkraínumönnum ómögulegt að verja sig í framtíðinni.

Rússar hafa ítrekað lagt fram umfangsmiklar kröfur sem skilyrði fyrir friði og hafa þær tekið litlum breytingum frá upphafi innrásar þeirra. Má þar nefna að Úkraína verði ekki aðili að NATO, lýsi yfir ævarandi hlutleysi, leggi niður vopn og takmarki stærð herja sinna verulega.

Einnig krefjast Rússar fullrar stjórnar á öllum svæðum sem þeir stjórna og meira en það. Auk þess eiga Úkraínumenn að gangast „afnasistavæðingu“. Rússar hafa lengi haldið því fram að Úkraínu sé stýrt af nasistum en það er rangt.

Bæði Rússar og Úkraínumenn eru í raun að reyna að sýna Trump að þeir séu tilbúnir til friðarviðræðna en andstæðingar þeirra séu það ekki. Trump og hans ráðgjafar hafa gefið til kynna að þeir séu tilbúnir til að stíga frá samningaborðinu og hafa einnig gefið til kynna að þeir gætu hætt stuðningi við Úkraínu, sem yrði mikill sigur fyrir Pútín.

Þrír fundir eiga í raun að eiga sér stað í Tyrklandi í dag. Í Ankara hittir Selenskí Erdogan. Svo eiga erindrekarnir að hittast í Istanbú. Þar að auki funda utanríkisráðherrar NATO-ríkja í Antalya við strendur Miðjarðarhafsins.