Flestir á­nægðir með Krist­rúnu en mest ó­á­nægja með Bjarna

Samkvæmt könnuninni telja flestir að Kristrún Frostadóttir, forsætisráðherra og formaður Samfylkingarinnar, hafi staðið sig vel. Þar á eftir koma samstarfskonur hennar í ríkisstjórn, en yfir 34 prósent telja þær hafa staðið sig vel. Af formönnum stjórnarandstöðuflokkanna telja flestir að formaður Framsóknar hafi staðið sig vel, eða 28 prósent.

Tæp 65 prósent telja Bjarna Benediktsson hafa staðið sig illa, 59 prósent nefna Sigmund Davíð, en aðrir formenn eru mun síður nefndir í því samhengi. 

Stjórnmálafræðiprófessorinn Eiríkur Bergmann segir Kristrúnu njóta þess að vera nýtekin við forsætisráðuneytinu. Nánast allt Samfylkingarfólk virðist ánægt með hana.

„Og fólk úr öðrum flokkum sem hrífst af henni líka. Þannig að hún er í verulegum meðbyr,“ segir Eiríkur.

Bjarni hafi hins vegar stöðugt mælst óvinsæll um langt skeið.

„Það að formaður Sjálfstæðisflokksins mælist svona neðarlega, að svona margir séu óanægðir með hann, það er auðvitað mjög erfið staða fyrir formann þess flokks.“

Mögulegt sé að ákvörðun Bjarna um að veita hvalveiðileyfi, eftir að úrslit kosninganna lágu fyrir, spili þar inn í. Rúmur helmingur kvaðst óánægður með ákvörðunina samkvæmt könnuninni. Fjórum prósentustigum fleiri en sögðust andvíg hvalveiðum.

„Og það eru augljóslega margir úr röðum Sjálfstæðismanna líka, sem telja þetta hafa verið óheppilegt.“

Stjórnin njóti nú hveitibrauðsdaganna 

Um 55 prósent segjast bjartsýn fyrir komandi ári, sambærilegt hlutfall fólks sem segist ánægt með nýtt ríkisstjórnarsamstarf, en kjörfylgi stjórnarflokkanna var rétt rúm 50 prósent.

„Við sjáum það mjög gjarnan að fylgi við ríkisstjórn fer upp, og jafnvel upp fyrir kjörfylgi flokkanna, svona framan af. Svo dalar það nú fljótt aftur. Núna eru hveitibrauðsdagarnir, þannig að ríkisstjórnin nýtur þess,“ segir Eiríkur.

Stuðningsfólk flokka sem ekki náðu inn á þing, Sósíalista, Pírata og VG, er ánægt með samstarfið í 63 til 70 prósent tilfella. Eiríkur segir líkur á að stjórnarflokkarnir sópi til sín fylgi þessara flokka.

„Kjósendur þessara flokka fara að öllum líkindum að máta sig við aðra flokka. Það gerir stöðuna enn erfiðari fyrir þá flokka sem duttu út.“

Flestir bjartsýnir á heilbrigðiskerfið

Í könnuninni var einnig spurt um einstaka málaflokka, og hvort fólk teldi að niðurstöður alþingiskosninganna hefðu góð eða slæm áhrif á þá. 

Sá málaflokkur sem flestir töldu að niðurstöðurnar hefðu góð áhrif á var heilbrigðiskerfið, en tæp 62 prósent taldi svo vera, á meðan 13,5 prósent töldu að áhrifin yrðu slæm. Aðrir töldu að niðurstöðurnar hefðu engin áhrif.

Þar á eftir komu efnahagsmál, þar sem um 57 prósent töldu niðurstöðurnar koma til með að hafa góð áhrif, en rúm 24 prósent slæm. Þá töldu tæp 53 prósent að áhrifin á menntamál yrðu góð, en 12 prósent slæm.

Samgöngumálin koma næst, þar sem 44 prósent töldu að niðurstöðurnar hefðu góð áhrif á málaflokkinn, en 25 prósent slæm. Fjárhagsstaða svarendanna sjálfra rak svo lestin. Rúm 32 prósent töldu að niðurstöðurnar myndu hafa góð áhrif á hana, en 25 prósent töldu hag sinn myndu versna vegna þeirra. Þar töldu 43 prósent að niðurstöðurnar breyttu engu um fjárhagsstöðu þeirra.