Krefjast þess að Rússar sendi her­menn Kim heim

Þá fordæmdi ráðherrann varnarsamvinnu Rússa með Norður-Kóreu og krefjast yfirvöld í Suður-Kóreu að Rússar hætti henni, þar sem slíkt sé brot á samþykktum öryggisráðs Sameinuðu þjóðanna.

Yonhap-fréttaveitan vitnar í yfirlýsingu frá sendiráði Rússlands í Suður-Kóreu um að samvinna Rússlands og Norður-Kóreu beinist með engum hætti að Suður-Kóreu og að samvinna ríkjanna væri í samræmi við alþjóðalög.

Ráðamenn í Úkraínu hafa að undanförnu haldið því fram að Rússar hafi fengið liðsauka frá Norður-Kóreu. Það tóku yfirvöld í Suður-Kóreu svo undir. Leyniþjónusta Suður-Kóreu sagði frá því á dögunum að Kim Jong Un, einræðisherra Norður-Kóreu, hefði þegar sent um 1.500 sérsveitarmenn til Rússlands og ætlaði sér að senda um tólf þúsund hermenn til viðbótar.

Sérsveitarmennirnir eru sagðir vera í þjálfun í austurhluta Rússlands og á að standa til að senda þá til Úkraínu eða Kúrsk.

Rússneska fréttaveitan Interfax, sem er í eigu rússneska ríkisins, hefur eftir Dmitrí Peskóv, talsmanni Pútíns, að fregnir af hermönnum frá Norður-Kóreu í Rússlandi séu „misvísandi“. Hann sagði yfirvöld í Suður-Kóreu segja eitt og Bandaríkjamenn annað en neitaði því þó ekki að fregnirnar væru réttar.

Þess í stað sagði hann Rússland og Norður-Kóreu náin bandalagsríki og unnið væri að þróun sambands ríkjanna á öllum sviðum. Það væri réttur þeirra og ætti ekki að verja áhyggjuefni fyrir neinn, þar sem þessi samvinna beindist ekki að neinu þriðja ríki.

Sjá einnig: Eldflaugum frá Norður-Kóreu skotið að Úkraínu

Kim og Vladimír Pútín, forseti Rússlands, skrifuðu í sumar undir varnarsamkomulag og hafa Rússar fengið mikið magn hergagna, skotfæra og eldflauga frá Norður-Kóreu til að nota við innrásina í Úkraínu.

Brjóta gegn samþykktum öryggisráðsins

Ráðamenn á Vesturlöndum og sérfræðingar hafa lýst yfir áhyggjum af því að í skiptum fyrir aðstoð við innrásina í Úkraínu eigi Kim von á aðstoð varðandi hergagnatækni, varðandi þróun gervihnatta og kafbáta, svo eitthvað sé nefnt.

Á fundi utanríkisráðherrans og sendiherrans í morgun komu Suður-Kóreumenn því á framfæri að samvinna með Norður-Kóreu á sviði varnarmála væri skýrt brot á mörgum samþykktum öryggisráðs Sameinuðu þjóðanna. Samþykktum sem Rússar, sem eru með fast sæti í ráðinu og neitunarvald, samþykktu.

„Veruleg stigmögnun“

Mark Rutte, nýr framkvæmdastjóri Atlantshafsbandalagsins, sagðist í morgun hafa rætt við Yoon Suk Yeol, forseta Suður-Kóreu. Þeir hefðu meðal annars rætt um samstarf NATO og Suður-Kóreu og meinta hermannaflutninga frá Norður-Kóreu til Rússlands.

NATO eða yfirvöld í Bandaríkjunum hafa ekki tekið undir yfirlýsingar Úkraínumanna og yfirvalda í Suður-Kóreu, en Rutte sagði að reyndist það rétt að hermenn frá Norður-Kóreu yrðu sendir gegn úkraínskum hermönnum væri um verulega stigmögnun að ræða.

David Lammy, utanríkisráðherra Bretlands, er staddur í Suður-Kóreu en AFP fréttaveitan hefur eftir honum að aðgerðir Rússa væru „glæfralegar og ólöglegar“. Hann sagði að yfirvöld í Bretlandi myndu bregðast við þeim.

Sögðu hergagnasendingar til Úkraínu koma til greina

Yonhap hefur eftir Yoon, áðurnefndum forseta Suður-Kóreu, að Suður-Kórea muni bregðast við samvinnu Pyongyang og Moskvu og að hann vonist til þess að það verði gert í samvinnu með NATO og aðildarríkjum bandalagsins.

Ráðamenn í Suður-Kóreu gáfu til kynna í sumar, eftir að Pútín og Kim skrifuðu undir áðurnefnt varnarbandalag, að til greina kæmi að senda hergögn til Úkraínu.

Hergagnaframleiðsla hefur aukist mjög í Suður-Kóreu á undanförnum árum, eftir að markvissar ákvarðanir um slíkt voru teknar þar í landi á níunda áratug síðustu aldar.

Suður-Kórea er einn stærsti vopnaframleiðandi heims en ríkið hefur hingað til ekki viljað senda hergögn til Úkraínu, þrátt fyrir áköll um slíkt frá bakhjörlum Úkraínu eins og Bandaríkjamönnum. Kóreumenn hafa þó selt bandamönnum Úkraínumanna, eins og Pólverjum mikið magn hergagna á undanförnum árum.