Grænir skattar sagðir bitna hart á Græn­landi

Í greininni segir að bæði danskir ​​og evrópskir stjórnmálamenn hafi ríkan metnað til að færa orkunotkun yfir í jarðefnalaust eldsneyti. Það verði grænlenskum neytendum dýrt, þó svo að skattar og gjöld í krafti sjálfsstjórnarlaga Grænlands séu á ábyrgð grænlenska þingsins Naalakkersuisut.

Vegna þess að það séu bara neytendur sem borga þegar ný gjöld eru lögð á vöruflutninga og flug. Nýju grænu skattarnir hafi áhrif á farmgjöld skipafélaga og framtíðargjöld flugfarþega hafi áhrif á alla sem fljúga á milli Danmerkur og Grænlands.

Frá og með nýju ári mun Evrópusambandið taka upp kolefnisskatt á alla skipaflutninga inn og út úr sambandinu. Það segir Sermitsiaq bitna hart á grænlenska skipafélaginu Royal Arctic Line. Skipafélagið hafi séð sig knúið til að hækka farmgjöldin frá og með nýju ári um eitt prósent í bili.

Royal Arctic Line viti þó ekki í raun og veru hvað nýja gjaldið til ESB mun kosta. Það gæti hæglega orðið enn hærra. Skatturinn sé innheimtur með því að skipaútgerðir þurfi að kaupa loftslagskvóta á markaði. Verð þeirra ráðist af framboði og eftirspurn og búast megi við að verðið hækki í framtíðinni einfaldlega vegna meiri eftirspurnar.

Grænlenski fréttamiðillinn bendir á að Evrópusambandið hyggist nota fjármunina til að styðja verkefni í þágu grænna orkuskipta, meðal annars til að virkja vatnsafl, og að raforkan verði síðan notuð til að framleiða vetni eða ammoníak. Augljós tækifæri séu fyrir Grænlendinga til sækja fjármuni til Evrópusambandsins til slíkra verkefna á Grænlandi.

Öðru máli gegni um skattinn sem Danmörk muni setja á allt flug frá árinu 2025. Danska þingið hafi nefnilega ákveðið fyrirfram að tekjur af því renni til styrkja danska lífeyriskerfið í Danmörku. Flugfarþegaskatturinn þýði í reynd að grænlenskir ​​lífeyrisþegar þurfa að borga fyrir að danskir ​​lífeyrisþegar fái sinn lífeyri hækkaðan, segir Sermitsiaq.

Flugfarþegaskattur verði upphaflega 30 danskar krónur, um 600 íslenskar krónur, á farþega til Grænlands frá 2025. Skatturinn verði síðan hækkaður árið 2030 í 50 danskar krónur, um 1.000 íslenskar krónur.

„Flugskatturinn er hækkun á þegar mjög dýrum farmiða. Við verðum að styðja græn umskipti heima og á heimsvísu. En það er ósanngjarnt að grænlenskir ​​neytendur þurfi að greiða fyrir viðbótarlífeyrisbætur í Danmörku til að komast heim til Grænlands,“ segir Aaja Chemnitz Larsen, þingmaður Grænlendinga á danska þinginu, í viðtali við Sermitsiaq.

Grænlenski þingmaðurinn óttast jafnframt að flugfarþegaskatturinn hafi áhrif á ferðaþjónustuna sem fylgi nýju flugvöllunum í Nuuk, Ilulissat og Qaqortoq.

„Það eru skýrar væntingar um að nýju Atlantshafsflugvellirnir muni fjölga ferðamönnum til Grænlands. Ég óttast að flugskatturinn muni fæla ferðamenn frá því að heimsækja Grænland,“ segir Aaja Chemnitz.

Hún segist hafa borið málið upp við danska skattamálaráðherrann en ekki fengið nein svör, enn sem komið er. Hún segist þó hugga sig við að flugskatturinn til Grænlands verði í lægsta þrepi, það er 30 krónur danskar, sama gjald og verði í innanlandsflugi innan Danmerkur.

Fjallað var um orkumál Grænlendinga í þessari frétt Stöðvar 2 fyrir tveimur árum: