Lög­reglu­maður sak­felldur fyrir að hafa orðið fót­bolta­manni að bana

Monk var sakfelldur fyrir manndráp af dómstóli í Birmingham í dag. Kviðdómendur tóku sér átján klukkutíma og fjörutíu og átta mínútur til að ræða hver niðurstaðan yrði. Monk var sýknaður af morði en kviðdómendur voru samróma um að hann skyldi sakfelldur fyrir manndráp.

Monk er fyrsti lögreglumaðurinn sem dæmdur er fyrir verknað, sem hann framdi á meðan hann var í vinnunni, í meira en þrjá áratugi á Bretlandi. Monk var sakaður um það fyrir dómi að ljúga um það sem gerðist þetta kvöld og að hafa sparkað og stappað á höfðu Atkinsons á meðan hann var vart við meðvitund. Monk sparkaði svo fast í höfuð Atkinsons að blóð fannst á skóm Monks.

Annar lögreglumaður hefur verið sakaður um aðild að manndrápinu, hún Mary Ellen Bettley-Smith, sem hefur neitað því að hafa valdið Atkinson líkamlegum skaða. Bettley-Smith er sökuð um að hafa barið Atkinson með kylfu á meðan hann lá í jörðinni.

Atkinson var fyrir utan heimili föður síns, sem Atkinson hafði keypt fyrir hann eftir að hann varð atvinnufótboltamaður, þegar lögreglu bar að garði. Klukkan var hálf tvö að nóttu í ágúst 2016 og höfðu nágrannar kvartað vegna hávaða.

Atkinson var hvað þekktastur fyrir að leika með fótboltaliðinu Aston Villa en hann hafði einnig spilað fyrir fótboltalið í Suður-Kóreu, Spáni og Tyrklandi. Hann settist í helgan stein árið 2001.