Starfsfólk Jóa Fel sagt skulda hundruð þúsunda

Fyrrverandi starfsmönnum bakarískeðjunnar Jóa Fel sem fór á dögunum í gjaldþrot hefur borist kröfubréf um óuppgreidda skuld starfsmanna við fyrirtækið. Starfsmennirnir koma af fjöllum varðandi meintar skuldir. Bréfin eru send frá skiptastjóra þrotabúsins en engar skýringar koma fram í bréfinu hvers vegna starfsfólkið skuldi peningana.

Bréfið er dagsett þann 30. október og þar kemur fram að við yfirferð á bókhaldi bakarískeðjunnar hafi komið í ljós óuppgerð skuld viðkomandi við fyrirtækið. Skuldin er hjá sumum nokkrir tugir þúsunda og upp í nokkur hundruð þúsund krónur.

Fulltrúi skiptastjóra segir að verið sé að leita skýringa á skráðum skuldum í bókhaldi félagsins. Engar nornaveiðar séu í gangi.

Klóra sér í kollinum

Umræða hefur skapast meðal starfsmanna, meðal annars í Facebook-hópnum Beauty Tips!, og skilur enginn upp né niður. Flestir þessara starfsmanna hættu störfum áður en til gjaldþrotsins kom.

Vísir ræddi við einn fyrrverandi starfsmann sem segist í samtali við Vísi ekki hafa hugmynd um hvað hún eigi að skulda fyrirtækinu. Starfsfólk hafi skrifað á sig þegar það hafi fengið sér að borða og það dregið frá launum hver mánaðamót.

Henni sýnist í fljótu bragði sem bréfið hafi ekki borist þeim sem voru enn við störf þegar bakarískeðjan varð gjaldþrota. Það geti mögulega skýrst af því að fjöldi starfsmanna eigi inni laun hjá fyrirtækinu. Varla standi til að rukka þá.

Náði ekki fyrirtækinu aftur

Sveinbjörn Claessen lögmaður hjá Landslögum, sem sendi bréfin fyrir hönd skiptastjóra, segir einfaldlega verið að reyna að átta sig á þessum skráðu skuldum.

Skiptastjóri hafi bókhald félagsins undir höndum og verið sé að leita skýringa á þessum skráðu skuldum. Aðspurður segir hann ekki aðeins um fyrrverandi starfsfólk að ræða heldur fleiri aðila. Bréfin nemi nokkrum tugum en hann hefur ekki nákvæma tölu við höndina.

Þá áréttar hann að skiptastjóri sé ekki á neinum nornaveiðum. Farið verði yfir viðbrögð fólks og staðan tekin í framhaldinu.

Bakarameistarinn keypti stærstu eignirnar út úr þrotabúi Jóa Fel skömmu eftir gjaldþrot og hefur opnað útibú á nokkkrum stöðum þar sem áður var bakarí Jóa Fel. Jói Fel gerði sjálfur tilraun með hópi fjárfesta að endurheimta fyrirtækið en tókst ekki.

Fréttin hefur verið uppfærð með viðbrögðum skiptastjóra.