Ný streymisveita verði heimili ís­lenskrar fram­leiðslu

Í tilkynningu frá félögunum segir að á meðal þess sem verður í boði sé úrval af leiknum íslenskum seríum á borð við Pressu, Næturvaktina, Fóstbræður, Ástríði og Stelpurnar. Þar verður líka að finna skemmtiefni eins og Tekinn, Heimsókn, Hæðina og Ísskápastríð. Safnið mun spanna fjóra áratugi af íslenskri sjónvarpsframleiðslu.

Tilkynnt var um samstarfið í afmælisþætti sem sýndur var í kvöld, á fjörutíu ára afmæli fyrstu útsendingar Stöðvar 2 þann 9. október 1986.

Stærsti hluti þess efnis sem fer á Heima var upphaflega frumsýnt á Stöð 2 og SÝN en að auki verður í boði úrval efnis sem framleitt hefur verið í gegnum tíðina af Sagafilm.

Heima er í sameiginlegri eigu Sýnar og Sagafilm og fyrirtækin leggja bæði til dagskrársöfn sín og reka veituna í sameiningu.

„Þetta er efni sem þjóðin ólst upp við og það hefur legið í söfnum. Fjörutíu ár af íslensku sjónvarpsefni varð ekki til af sjálfu sér. Það er til af því að fólk kveikti á sjónvarpinu, borgaði áskriftina og fylgdist vel með. Okkur langar að skila því til baka á einn stað þar sem auðvelt er að finna það,“ segir Kristjana Thors Brynjólfsdóttir, framkvæmdastjóri miðla hjá Sýn, í tilkynningu.

Skarphéðinn Guðmundsson, framkvæmdastjóri Sagafilm, segir í tilkynningunni að íslenskt sjónvarpsefni eigi skilið betra heimili en að safna ryki í hillum sem enginn hefur aðgang að.

„Með þessari nýju alíslensku streymisveitu gefst loksins tækifæri til að nálgast síbreytilegt úrval af íslensku gæðaefni, kvikmyndum, leiknum seríum, allt frá glæpaseríum, dramaseríum til gamansería til sjónvarpsþátta af hvers kyns toga, auk heimildamynda. Stóra markmiðið er svo að Heima verði vísir að heimili íslenskrar framleiðslu. “

Í tilkynningunni segir að Heima fari í loftið á næstu vikum og verði aðgengilegt í gegnum sjónvarpsþjónustu Sýnar. Nánari upplýsingar um opnunardag, verð og vöruframboð verða kynntar þegar veitan opnar.

Vísir er í eigu Sýnar.