Sparisjóðir Skagafjarðar og Siglufjarðar sameinast

Stjórnir Sparisjóðs Skagafjarðar og Sparisjóðs Siglufjarðar hafa undirritað áætlun um samruna sparisjóðanna. Í tillögu sem lögð verður fyrir fund stofnfjáreigenda er gert ráð fyrir því að eigið fé hins sameinaða sjóðs verði um einn milljarður króna.

Samruni sparisjóðanna var samþykktur á stjórnarfundi þeirra í nóvember síðastliðnum en hann miðast við 1. janúar síðastliðinn.

Eftir samrunann munu stofnfjáreigendur í Sparisjóði Skagafjarðar eiga

12 prósent í sameinuðum sparisjóði en eigendur stofnfjár í Sparisjóði Siglufjarðar 88 prósent. Þá hefur stofnfjáraðilafundur í Sparisjóði Siglufjarðar ákveðið að auka stofna í sparisjóðnum um 516 milljónir króna til að ná  ofangreindri skiptingu.

Stofnfjáraðilar í Sparisjóði Skagafjarðar eru um 140 talsins. Sjóðurinn var stofnaður árið 1907 og hét áður Sparisjóður Hólahrepps. Sjóðurinn starfaði í Hólahreppi fram til ársins 2000, þegar starfsemi hans var flutt til Sauðárkróks

Sparisjóður Mýrasýslu á 99,9 prósent af stofnfé Sparisjóðs Siglufjarðar og er hann dótturfélag Sparisjóðs Mýrasýslu. Sjóðurinn var stofnaður árið 1873 og er elsta starfandi peningastofnun landsins.

Tilkynning sparisjóðanna til Kauphallar Íslands