365 miðlar selja DV, Hér og Nú og Veggfóður

365 miðlar hafa selt dagblaðið DV og tímaritin Hér og Nú og Veggfóður. Dagblaðið-Vísir útgáfufélag ehf, sem er í eigu 365, Hjálms ehf, Sigurjóns M. Egilssonar og Janusar Sigurjónssonar, kaupir DV en útgáfufélagið Fögrudyr ehf., sem gefur út tímaritið Ísafold, kaupir tímaritin. Samhliða breytingunum verður vikuritið Birta fellt inn í Fréttablaðið á nýju ári.

Sigurjón M. Egilsson hefur verið ráðinn ritstjóri DV. Stjórnarformaður Dagblaðið-Vísir útgáfufélags er Hreinn Loftsson, en hann er einnig stjórnarformaður Hjálms ehf. Framkvæmdastjóri félagsins verður Hjálmar Blöndal.

Í tilkynningu til Kauphallar Íslands segir að 365 miðlar hafi endurskipulagt prentútgáfu sína með það að markmiði að skerpa áherslur og auka arðsemi í rekstri 365. 365 miðlar muni á prentsviðinu einbeita sér að útgáfu Fréttablaðsins og fylgirita þess, en útgáfa annarra sjálfstæðra prentmiðla flyst annað, eftir atvikum með aðild 365. Þetta sé hluti af þeirri stefnumörkun að efla kjarnastarfsemi 365 á sviði dagblaðaútgáfu, sjónvarps, útvarps og vefmiðlunar og stefna að forystuhlutverki á þeim sviðum miðlunar þar sem 365 starfar.

Þá kemur fram að til 365 á 40 prósenta hlut í félaginu Dagblaðið-Vísir útgáfufélag ehf. en Hjálmur fer með 49 prósenta hlut. Aðrir eigendur eru feðgarnir Janus Sigurjónsson og Sigurjón M. Egilsson.

Þá er aðaleigandi Fögrudyra Hjálmur ehf., sem mun jafnframt kaupa af 365 miðlum hlut í tímaritinu í Bístró, sem verður þá nokkurn veginn að jöfnu í eigu 365, Hjálms og starfsmanna Bístró.

Miðlarnir við þetta færast frá 365 og verða reknir á eigin forsendum.

Beinn fjárhagslegur ávinningur af þessum breytingum nemur ríflega 100 milljónum króna á ársgrundvelli en gert hefur verið ráð fyrir þessari hagræðingu í þegar birtum áætlunum á næsta ári, að því fram kemur í tilkynningunni.