Mikið af ruslpósti

Allt að 95 prósent allra tölvuskeyta er ruslpóstur, villuboð og vírusar en aðeins tæp 4 prósent allra skeyta innihalda eitthvað gagnlegt. Þetta er niðurstaða könnunar breska netfyrirtækisins Return Path.

Í könnuninni kemur fram að langstærstur hluti veirutölvuskeyta eru áframsend skeyti sem veirur eða tölvuormar stela úr tölvum netverja og senda áfram í aðrar tölvur. Að sögn forsvarsmanna fyrirtækisins nappa veirurnar netföngum frá allt að 20 milljón tölvum til að senda ruslapóstinn áfram.

Sérfræðingar kenna aukinni notkun sítenginga á háhraðaneti um magn ruslpóstsins. Því sé nauðsynlegt að hafa öflugar vírusvarnir og uppfæra þær reglulega.

Vírusbanafyrirtækið Sophos birti á dögunum lista yfir þau lönd þar sem ruslpóstsendingar eiga upptök sín. Í 23,2 prósentum tilvika hófst ferð ruslpósts um netið í Bandaríkjunum en það er hæsta gildið. Í öðru sæti var ruslpóstur frá Kína, sem var um fimmtungur. Þá hófu 7,5 prósent ruslpóstsins ferð sína um netið frá Suður-Kóreu, 5,2 prósent frá Frakklandi og 4,8 prósent frá Spáni. 1,8 prósent ruslpóstsins var upprunninn í Bretlandi og lenti landið í 10. sæti, að sögn breska ríkisútvarpsins, BBC.