Of snemmt að spá

Merill Lynch telur skuldabréf í Glitni og Landsbankanum stöðuga fjárfestingarkosti, en ekki sérlega spennandi. Greiningardeildin mælir síður með skuldabréfum í KB banka og telja mesta hættu á að bankinn lendi í erfiðleikum með endurfjármögnun skuldabréfa.

Skýrsla Merrill Lynch ber titilinn Of snemmt að spá, og er þar vísað til ummæla fyrrum forsætisráðherra Kína, Zhou Enlai, þegar hann var spurður um áhrif frönsku byltingarinnar á strauma og stefnur í stjórnmálum. Þetta er önnur skýrsla Merrill Lynch um íslensku bankana á árinu, en sú fyrri var af mörgum talin hafa átt stóran þátt í gengisfalli krónunnar snemma árs. Tónn nýju skýrslunnar er öllu léttari þótt enn treysti höfundar sér ekki til að lýsa trausti á íslenska bankakerfið.

Merrill Lynch segir að væntanleg uppgjör Glitnis og KB banka gefi ranga mynd af raunverulegri stöðu. Stór hluti hagnaðarins sé til kominn vegna hækkunar verðtryggðra eigna og gjaldeyrishagnaðar, auk þess sem veiking íslensku krónunnar gagnvart erlendum gjaldmiðlum sýni uppgjörin í jákvæðara ljósi en ella.

Merrill Lynch telur að þrátt fyrir að dregið hafi úr krosseignarhaldi og eignatengslum í íslensku viðskiptalífi sé enn langt í land. Tengsl KB banka og Exista eru sérstaklega nefnd til sögunnar auk lána Glitnis til æðstu stjórnenda bankans. Þá lýsir höfundur skýrslunnar yfir áhyggjum sínum af framvindu mála í Straumi-Burðarási, þar sem ýmislegt hafi gengið á undanfarin misseri.

Merrill Lynch telur KB banka enn veikastan fyrir endurfjármögnun á markaði og áætlar að bankinn þurfi rúma sex hundruð milljarða íslenskra króna fyrir árslok 2007 til að standa við skuldbindingar.

Það er ýmislegt sem veldur okkur áhyggjum. Þar mætti nefna krosseignarhald auk lána bankanna til hluthafa og stjórnenda. Hins vegar virðist sem ýmislegt horfi til betri vegar. Athyglisvert er að frumkvæðið kemur ekki frá löggjafanum heldur markaðnum sjálfum, segir í skýrslunni.

Skýrsluhöfundar Merrill Lynch eru öllu svartsýnni en greiningardeild bandaríska fjármálafyrirtækisins Morgan Stanley. Morgan Stanley gaf á dögunum út fréttarit þar sem meðal annars var mælt með kaupum á skuldabréfum í Glitni og bent á að þrátt fyrir að íslenskt efnahagslíf væri óstöðugt kæmu sextíu prósent tekna bankans erlendis frá.