Sé ekki að Keflavík tapi

Keflavík og Grindavík eigast við í fyrstu umferð úrslitakeppni Intersportdeildarinnar í körfuknattleik á heimavelli Keflvíkinga í kvöld. Einar Bollaspon spáir í spilin fyrir Vísi. Tveir leikir eru afstaðnir og hefur hvort liðið um sig haft einn sigur. Þetta er því hrein úrslitaviðureign og liðið sem stendur uppi sem sigurvegari í kvöld tryggir sér sæti í undanúrslitum. Keflavík vann fyrsta leikinn örugglega, 101-80, en Grindavík náði að knýja fram oddaleik með því að vinna í Grindavík, 87-76. Þar vakti sterk vörn heimamanna athygli og fengu Grindvíkingar byr undir báða vængi fyrir komandi átök. "Fyrir fólk sem sá leikinn í Keflavík, hvort sem það var á staðnum eða heima í stofu, þá er það alveg með ólíkindum að Grindavík skuli hafa unnið leikinn í Grindavík," sagði Einar Bollason, fyrrum landsliðsmaður og þjálfari. "Manni dettur helst í hug að Keflvíkingar hafi haldið að þeir þyrftu ekkert að mæta." Grindvíkingar hafa átt í töluverðu basli í vetur og tveir erlendir leikmenn þurft frá að hverfa. Þá varð liðið fyrir áfalli þegar Guðlaugur Eyjólfsson ákvað að hætta að leika með liðinu í mótmælaskyni við stefnu stjórnarinnar hvað varðar erlenda leikmenn. "Auðvitað samgleðst maður Grindvíkingum af því að þetta er búið að vera mjög erfiður vetur hjá þeim. Það sást vel í leiknum hvað Helgi Jónas Guðfinnsson er mikilvægur liðinu. Grindavíkurliðið er til alls líklegt og ef Grindvíkingar bera gæfu til að nota þennan trukk sem Taylor er í miðjunni og spara skotin fyrir utan geta þeir gert ýmislegt. Ég sé nú ekki í spilunum að Keflavíkurhraðlestin tapi þessum leik. Ég held að Keflvíkingar klári þetta. Liðið missti af báðum bikartitlunum, náði að vísu deildarmeistaratitlinum, en ég held að heimamenn vinni," sagði Einar Bollason.