Steinar Kaldal úr leik hjá KR

Steinar Kaldal, fyrirliði meistaraflokksliðs KR í körfuknattleik, verður frá keppni næstu sex vikur vegna höggs sem hann fékk í leik gegn Snæfelli á laugardag. Fram kemur á heimasíðu KR-inga að Steinar hafi fengið högg í kviðinn sem leiddi til innvortis blæðinga. Höggið fékk Steinar undir lok fyrri hálfleiks en hann mun hafa harkað af sér og lokið leiknum. Hins vegar jukustu verkirnir og fór hann því á bráðamóttöku Landspítalans. Hann dvaldi í fyrrinótt á gjörgæslu og um tíma var talið að fjarlægja þyrfti miltað en svo reyndist ekki. Steinar er nú á legudeild og verður þar næstu daga. Hann missir því af oddaviðureign KR og Snæfells á miðvikudag og sömuleiðis afgangnum af úrslitakeppninni komist KR áfram.