Jeff Jordan næsta stórstjarna?

Í treyju númer 32 í körfuboltaliðinu Ramblers, sem er frá Loyola Academy gagnfræðaskólanum í Chicago í Bandaríkjunum, leynist ungur strákur að nafni Jeff Jordan. Það þykir ekki í frásögu færandi nema að þar á ferðinni eldri sonur Michael Jordan sem margir telja besta körfuboltamann allra tíma. Michael skiptir sér hins vegar lítið af stráknum að því leytinu til að hann er frjáls ferða sína. "Við viljum bara að hann skemmti sér vel," sagði Michael aðspurður um væntingar til drengsins. Sjálfur segir Jeff ekki hafa neinar áhyggjur af þeirri pressu sem fylgir því að vera sonur frægasta körfuboltamanns allra tíma en oft má heyra furðulegar glósur frá áhorfendum á leikjum Ramblers. "Við höfðum gaman af Space Jam," heyrðist m.a. er liðið mætti St. Patrick í gærkvöldi þar sem Ramblers hafði betur, 51-50. "Stundum væri gott að fólk liti á mig sem venjulegan leikmann," sagði Jeff eftir leikinn. "En eftir smá tíma venst maður þessu. Áhorfendur munu alltaf láta eitthvað fjúka en það er þó aldrei á slæmu nótunum. Ég reyni að nota það sem hvatningu." Að sögn bandarískra spekinga er yngri bróðir Jeff, Marcus Jordan, töluvert meira efni og er talinn besti körfuboltamaður Illionois-fylkis í sínum árgangi. Michael Jordan segist njóta fjölskyldulífsins til hins ítrasta. "Mér finnst dásamlegt að vera með krökkunum mínum og gera hluti sem sátu á hakanum hér áður. Körfubolti er enn ástríðan mín og ég mun festa kaup á NBA-liði þegar rétti tíminn kemur," sagði Michael sem vann 6 NBA-titla með Chicago Bulls.