Keflavík deildarmeistari

Einn leikur fór fram í úrvaldsdeild kvenna í körfuknattleik í kvöld er Keflavík tók á móti stöllum sínum úr Grindavík og sigruðu 88-72 eftir að hafa leitt í hálfleik 42-29. Keflavík hafði fyrir leikinn þegar tryggt sér deildarmeistaratitilinn og fengu bikarinn afhentan eftir leik. Atkvæðamest í liði heimastúlkna var Birna Valgarðsdóttir með 19 stig, en Anna María Sveinsdóttir, Svava Ósk Stefánsdóttir og Bryndís Guðmundsdóttir settu niður 12 stig auk þess sem Anna María tók 13 fráköst og gaf 6 stoðsendingar. Í liði Grindavíkur var María Anna Guðmundsdóttir atkvæðamest með 15 stig en Svandís Sigurðardóttir og Erla Reynisdóttir settu niður 12. Keflavík hafði undirtökin allan leikinn en Grindavíkurstúlkur spiluðu án landsliðsfyrirliðans Erlu Þorsteinsdóttur og nýja erlenda leikmannsins, Rita Williams, sem ekki er komin með leikheimild.