Jakob valinn í úrvalslið

Körfuknattleiksmaðurinn Jakob Sigurðarson hjá Birmingham Southern háskólanum í Alabama í Bandaríkjunum, var í gær valinn í annað úrvalslið Big South deildarinnar en þetta kemur fram á heimasíðu KR í dag. Jakob var fjórði stigahæsti leikmaður deildarinnar í vetur með 15.5 stig í leik. Birmingham Southern mætir Radford í kvöld í 8-liða úrslitum Big South. Jakob er í fjórða sæti yfir stigahæstu leikmenn í sögu Birmingham Southern með 1.442 stig og er á topp tíu listanum yfir skoraðar körfur og skot tekin, þriggjastigakörfur skoraðar og skottilraunir, víti skoruð og reynd, vítanýtingu, stoðsendingar og stolna bolta. BSC mætir Radford í nótt í 8-liða úrslitum Big South deildarinnar og hefst leikurinn kl. 02.00 að íslenskum tíma. Áhugasamir geta fylgst með leiknum í beinni útsendingu á Netinu á þessari slóð hér, en hann hefst kl. 19:00 að staðartíma.